काठमाडौं : नातिकाजी राष्ट्रिय विशिष्ट श्रष्टा सम्मान २०७७ गायन विधाकी नुपुर बनर्जी भट्टाचार्यलाई प्रदान गरिएको छ। राष्ट्रपति भवन शीतल निवासमा आज नातिकाजी स्मृति समाजले गरेको कार्यक्रममा राष्ट्रपति विद्यादेवी भण्डारीले उनीलगायत विभिन्न कलाकार, समाजसेवी र पत्रकारलाई पुरस्कार र सम्मान प्रदान गरेकी हुन्।
विभिन्न विधामा गरी नातिकाजी राष्ट्रिय विशेष सङ्गीत सम्मान, २०७७ नारायणदास कार्की ढली, प्रदीप उपाध्याय, उमेश पाण्डे, एसपी कोइराला, कुन्ती मोक्तान, राजकुमार श्रेष्ठ, बिबि थापा, शहदेव ढुङ्गाना, प्रभु ढकाल, शिला पन्त, सीताराम पोखरेल, ज्ञानेन्द्र गदाल, हरिभक्त बुढाथोकी र शीतल कादम्बिनीलाई प्रदान गरिएको छ।
नातिकाजी राष्ट्रिय सङ्गीत पुरस्कार, २०७७ अरुण तिवारी, सन्तोष श्रेष्ठ, निशा देशार र शिव परियारलाई प्रदान गरिएको छ। नातिकाजी राष्ट्रिय प्रतिभा पुरस्कार, २०७७ डिपी दाहाल, अर्जुन पोखरेल, सिन्धु मल्ल र अजर जङ्गमलाई प्रदान गरिएको छ।
नातिकाजी राष्ट्रिय सङ्गीत संयोजन तथा वाद्य पुरस्कार एलिस कार्की ढलीलाई दिइएको छ। नातिकाजी राष्ट्रिय कला पत्रकारिता पुरस्कार विजयरत्न तुलाधर र दिवाकर मैनालीले पाएका छन्। नातिकाजी राष्ट्रिय शास्त्रीय सङ्गीत पुरस्कार, २०७७ अमृतहिरा तुलाधर योगी र नातिकाजी राष्ट्रिय लोक सङ्गीत पुरस्कार कृष्ण कँडेललाई दिइएको छ।
राष्ट्रपति भण्डारीले नातिकाजीका सिर्जना सम्पदाका रूपमा रहेको उल्लेख गरिन्। नातिकाजीका सिर्जनामा राष्ट्र, राष्ट्रियता र देशप्रेम ओतप्रोत रहेको उनको भनाइ छ। नेपाली मौलिकताको संरक्षण र संवर्द्धन गर्नु सबै नेपालीको कर्तव्य भएको उनले बताइन्। उनले भनिन्, ‘स्मृति समाजले कलाकारलाई सम्मान गरेर नवप्रतिभालाई प्रोत्साहित गरेको छ।’
तपाईंको ईमेल गोप्य राखिनेछ ।