बैतडी : बैतडीको तल्लो स्वराडका विद्यार्थी बेहोस हुन थालेपछि पठनपाठन प्रभावित भएको छ। मेलौली नगरपालिका–७ स्थित मणिलेक माविमा अध्ययनरत छात्राहरू विद्यालयमै बेहोस हुन थालेपछि पठनपाठन प्रभावित भएको हो।
विद्यालय आइसकेपछि छात्राहरू रुने, कराउने, काँप्ने, बेहोस हुने समस्या देखिएको मणिलेक माविका प्रधानाध्यापक रमेश दत्त बागले बताए। गएको हप्तादेखि छात्राहरूमा यो समस्या देखिएको हो।
उनले भने, ‘दैनिक ४/५ छात्राहरूमा यो समस्या देखिने गरेको छ। कक्षा ५ देखि १० कक्षासम्मका छात्राहरूमा बढीजसो यो लक्षण देखिएको छ। १२ देखि १४ वर्ष उमेर समूहका छात्रामा बढी समस्या छ।’
विद्यार्थीमा दैनिक बेहोस हुने समस्या देखिन थालेपछि पठनपाठन कार्य प्रभावित भएको प्रअ बागको भनाइ छ। बिहान विद्यालय आएर एक र दुई घण्टी पढेपछि उनीहरूमा यो समस्या शुरू हुन्छ।
एक छात्रालाई यो समस्या देखिएलगत्तै अरु छात्राहरूमा पनि लगत्तै देखिन्छ। छात्राहरूमा देखिएको यो समस्याको बारेमा स्वास्थ्यकर्मीहरूसँग पनि सोधेको उनले बताए।
उनले भने, ‘हामीले स्वास्थ्यकर्मीलाई पनि समस्याको बारेमा जानकारी गरायौं। स्वास्थ्यकर्मीकै सल्लाहअनुसार दुई पिरियड मात्र पठनपाठन गरेर बाँकी समय मनोरञ्जनमा जोड दिएका छौं।’
छात्राहरूमा देखिएको यो समस्या मास हिस्टेरिया रहेको स्वास्थ्य कार्यालय बैतडीका प्रमुख योगेशप्रसाद भट्टले बताए।
उनले भने, ‘यो सामान्य खालको बिरामीको लक्षण हुन्। उनीहरूमा भावना उत्पन्न भएर एकबाट अर्कोमा हुने गर्दछ। मनोपरामर्शलाई जोड दिनुपर्छ, सान्त्वना दिने, मनोबल बढाउने खालका कुरा गर्ने‚ सांस्कृतिक कार्यक्रम गरेर मनोरञ्जन दिने खालका कार्यक्रम गर्नुपर्छ।’ उक्त विद्यालयमा १ हजार बढी विद्यार्थी अध्ययनरत छन्।
तपाईंको ईमेल गोप्य राखिनेछ ।