रवीन्द्रलाई प्रकाशमानको कटाक्ष : पार्टी खोल्नु नाङ्लोमा पसल राखेजस्तो होइन

काठमाडौं : नेपाली कांग्रेसका नेता प्रकाशमान सिंहले दुई वर्ष पनि दल टिकाउन नसक्नेहरूले देशको विकास गर्ने कुरा सम्भव नहुने टिप्पणी गरेका छन्। 

शनिबार बानेश्वरमा कुमाले धारा मर्मतसम्भार तथा पार्क सौन्दर्यीकरण उद्घाटन कार्यक्रमलाई सम्बोधन गर्दे उनले विवेकशिला साझाका नेता रविन्द्र मिश्रप्रति इंगित गर्दै दुई वर्षसम्म पार्टी टिकाउन नसक्नेले देश विकास गर्छु भन्नु नहुने टिप्पणी गरेका हुन्। 

पार्टी खोल्नु नाङ्लोमा पसल खोलेर चलाउनु जस्तो नभएको भन्दै मिश्रप्रति पार्टी टिकाएर देखाउन चुनौती दिए। देश विकासको लागि काम गर्नलाई आफ्नो पार्टी टिकाएर देखाउन सक्नुपर्ने बताए। 

उनले आफ्नो निर्वाचन क्षेत्रमा नयाँ पार्टीको हावा चाँडै फैलिने गरेको उल्लेख गर्दै विचार गरेर मात्रै भोट हाल्न मतदाताहरूसँग आग्रह गरे। वि.सं. २०७४ को निर्वाचनमा तत्कालीन विवेकशील साझा पार्टीका संयोजक रविन्द्र मिश्रसँग ८१९ मतान्तरले मात्रै सिंह विजयी भएका थिए। 

‘यहाँ पुराना दलहरूले केही गर्न सकेनन् भने। अरू कसले गर्न सक्ला त? गर्न सकेन भनेर कराउने अधिकार कसले दियो? त्यही पुराना दल काँग्रेसले नै नेतृत्व गरेर जनआन्दोलनबाट मौका पाएको होइन’ उनले भने, ‘स्थापना गरेको दललाई एक वर्ष टिकाउन नसक्नेहरूले परिवर्तनको नारा दिँदैमा परिवर्तन हुन्छ? नारा दिँदैमा परिवर्तन हुने भए त सबैले दिन्थे नि । नाराले केही काम हुँदैन।’

आगामी मंसिर ४ गते हुने प्रतिनिधि सभाको निर्वाचनमा पनि हल्लाको पछि लाग्ने नभइ विवेकले देश विकास गर्न सक्षम उम्मेदवारलाई मतदान गर्न आग्रह गरे। 
उनले देश विकास गर्न पुराना कांग्रेस र कम्युनिष्ट पार्टीहरूलाई पनि गाह्रो परिरहेको बेलामा नयाँ पार्टीहरूले कुनै काम गर्न नसक्ने जिकिर गरे। उनले परिवर्तन गर्छु भनेर आएको दल अहिले कहाँ छ ? भन्दै प्रश्नसमेत गरे। 

‘पुराना दललाई त जनतालाई चित्त बुझाउन धौधौ भइरहेको छ भने भर्खरका दलले गर्छौं भनेर गर्न सकिन्छ र? परिवर्तन गर्ने नारा बोकेर आयो एउटा दल। परिवर्तन के गर्छ भनेको आफूले खोलेको दललाई सम्हाल्न सक्नुपर्छ नि परिवर्तन गर्ने दलले। सम्हाल्न सकेको छ? यहाँ आएको दल, व्यक्ति कहाँ पुग्यो? के गरिरहेको छ? राजनीति सजिलो छ? उनले प्रश्न गर्दै भने, ‘पार्टी खोल्ने भनेको चिज नाङ्लोमा पसल खोलेको जस्तो होइन। कांग्रेस र कम्युनिष्ट जस्तो पुरानो पार्टीलाई त गाह्रो छ भने नयाँ दलले कसरी गर्न सक्छन्। आफ्नो नाममा दर्ता भएको दललाई त दुई वर्ष टिकाउन सक्दैनन् भने यिनीहरूले काम गरेर देखाउन सक्ला? राम्रो मान्छेलाई मौका दिनुपर्छ।’ 

अहिले नेता मिश्र फेरि नेता सिंहसँग प्रतिस्पर्धा गर्ने तयारीमा छन्। राजेन्द्र लिङ्देन नेतृत्वको राप्रपासँग पार्टी एकता गरेर एमालेसँग तालमेलको गृहकार्य गरिरहेका छन्। सत्ता गठबन्धनबाट काठमाडौं १ बाट नेता सिंहको टिकट निश्चितजस्तै भए पनि स्वतन्त्रसहित मिश्रको उम्मेदवारी समस्या पर्ने देखिन्छ। 

तर, उनले फेरि भारी मतले विजय गराए देश हाँक्ने क्षमता आफूमा रहेको दाबी गरे। 

कम्युनिष्टकै कारण संघीयतामाथि प्रश्न 

स्थानीय र प्रदेश सरकारलाई आफ्ना अधिकार नदिँदा संघीयतामाथि प्रश्न उठेको बताए। उनले जनताको बहुमत पाउँदा समेत कम्युनिष्ट पार्टीहरूले संघीयताका कानून नबनाइँदिँदा संघीयतामाथि प्रश्न उठेको आरोप लगाए। 

उनु भयो । नेता सिंहले ट्रयाकबाट बाहिर गएको मुलुकलाई ट्रयाकमा ल्याउने काम कांग्रेसले गठबन्धन बनाएर गरिरहेको उल्लेख गर्दै आगामी निर्वाचनमा जितेर कांग्रेसले देश विकास गर्ने बताउनु भयो । 

‘स्थानीय सरकारलाई दिनुपर्ने, प्रादेशिक सरकारलाई दिनुपर्ने अधिकारहरू कानूनहरू नबनाइदिएको कारणले प्रश्न चिन्ह खडा भएको छ? संघीयता नेपालको लागि फलिफाप हो र भन्छ। कारण बहुमत दिँदा पनि कम्युनिष्टहरूले काम गर्न नसक्दा यस्तो अवस्था आएको हो’ उनले भने, ‘कानूनहरू नबनाइदिँदा यो अवस्था आयो। ट्रयाकबाट बाहिर गएको मुलुकलाई ट्रयाकमा ल्याएका छौँ अहिले गठबन्धन बनाएर। हामी देशको विकास गर्न अब तयार छौँ।’

अहिलेको शिक्षा प्रणाली बेरोजगार उत्पादन गर्ने प्रणाली भइरहेको भन्दै शिक्षाको नीति र प्रणालीमा परिवर्तन गर्न जरूरी रहेको बताए। शिक्षा दिनेसँगै सीप दिनेकामको विकास गर्न आवश्यक रहेको उनको भनाइ छ। 

हरेक वडा कार्यालयमा बोर्डमात्रै नभइ व्यवस्थित स्वास्थ्य संस्थाको विकास गर्नुपर्ने, देशभरका वडा कार्यालयका क्लिनिकहरूमा प्राथमिक उपचार गर्ने काम हुनुपर्ने र रोजगारीको अवसर सिर्जना गर्न आवश्यक रहेको बताए। 

‘अहिलेको शिक्षा प्रणाली बेरोजगार उत्पादन गर्ने प्रणाली भइरहेको छ। शिक्षाको नीति र प्रणालीमा परिवर्तन गर्न जरूरी रहेको छ। शिक्षा दिनेसँगै सीप दिनेकाम विकास गर्न आवश्यक छ। हरेक वडा कार्यालयमा बोर्डमात्रै नभइ व्यवस्थित स्वास्थ्य संस्था राख्नुपर्ने हुन्छ उनले भने, ‘देशभरका वडा कार्यालयका क्लिनिकहरूमा प्राथमिक उपचार गर्ने काम गर्नुपर्छ । रोजगारीको अवसर सिर्जना गर्न आवश्यक छ। 

आफू पैसा कमाउन, नाम कमाउन राजनीतिमा लागेको नभइ सेवाका लागि राजनीति गरेको बताए।