काठमाडौं : अमेरिकी पूर्वराष्ट्रपति डोनाल्ड ट्रम्प आफूविरुद्धको गोप्य सरकारी दस्तावेजको लापरबाहीपूर्ण व्यवस्थापनसम्बन्धी मुद्दामा मायामीस्थित अदालतमा हाजिर भएका छन्।
मंगलबार ट्रम्प निलो सुट र रातो टाई लगाएर अदालतमा हाजिर भए। करिब ४७ मिनेट भएको सुनुवाइमा उनी केही पनि बोलेनन्। टाउको झुकाएर बसिनै रहे। उनले आफू दोषी नभएका बताएका छन्। उनलाई कुनै शर्त वा यात्रा प्रतिबन्ध बिनानै अदालतले छोड्न अनुमति दिइएको थियो।
दुई घण्टा अदालतमा बिताएका उनले त्यसपछि समर्थकलाई सम्बोधन गर्दै मुद्दा राजनीति भएको र आफूलाई सन् २०२४ मा राष्ट्रपतिको उम्मेदवार बन्न नदिने षडयन्त्र भएको बताए।
उनका समर्थकहरुले अदालतबाहिर नाराबाजी गरेका थिए। पछिल्लो दुई महिनामा ट्रम्प दोस्रो पटक अदालतमा हाजिर भएका छन्। गत अप्रिलमा उनी अदालत पुगेका थिए।
सन् २०२१ मा राष्ट्रपति कार्यालयबाट बाहिरिँदा उनले सरकारी गोप्य कागजात अवैधानिक रुपमा आफूसँग राखेको लगायतका एक दर्जनजति आरोप लगाइएको छ। ट्रम्पको निजी निवासमा फेला परेका गोप्य दस्तावेजमा केही दस्तावेज परमाणु गोपनियतासम्बन्धी पनि रहेको जनाइएको छ।
ट्रम्पविरुद्ध फौजदारी अभियोगमा मुद्दा चलाइएको यो दोस्रो पटक हो भने कुनै पूर्वराष्ट्रपतिविरुद्ध संघीय सरकारले चलाएको यो पहिलो मुद्दा हो।
तपाईंको ईमेल गोप्य राखिनेछ ।