बैतडी : बैतडीको दुर्गम सिगास गाउँपालिका–५ मा रहेको शारदा मावि ढुङगाडका विद्यार्थी बेहोस हुन थालेपछि पठनपाठन प्रभावित भएको छ। गत दुई हप्तादेखि विद्यार्थी बेहोस हुने समस्या देखापरेको विद्यालयका प्रधानाध्यापक मीनबहादुर चन्दले बताए।
विद्यार्थी रुने, कराउने, बेहोस हुने, काँप्ने, ढल्ने समस्या देखा परेपछि पठनपाठन प्रभावित भएको छ। उनले भने, ‘विद्यार्थीमा विगत दुई हप्तादेखि रुने, कराउने र बेहोस हुने लक्षण देखा परेको छ। बढीजसो छात्रामा यो समस्या देखा परेको छ। विद्यालय समयमा यस्तो समस्या देखिएपछि पठनपाठन प्रभावित भएको छ।’
यो विद्यालय ५ वर्षअघि पनि विद्यार्थीहरूमा यस्तो समस्या देखा परेको थियो। त्यो वेला केही समयमै आफैं ठिक भए पनि हाल भने दुई हप्तासम्म पनि निको नहुँदा समस्या भएको विद्यालयले जनाएको छ। विद्यार्थीहरू बिहानको समयमा लाइनमा लागेका वेला र कक्षाकोठामा छात्राहरू बेहोस भएर ढल्ने गरेका छन्।
छात्राहरूमा रुने, कराउने र बेहोस हुने समस्या देखा पर्नुको कारण पत्ता लाग्न नसकेको र समस्या समाधानका लागि सिगास गापालाई खबर गरिएको प्रधानाध्यापक चन्दको भनाइ छ।
विद्यार्थीमा देखिएको समस्याबारे पालिकालाई जानकारी भएको र समस्या समाधानका उपाय खोजिने सिगास गापाका उपाध्यक्ष धाना धामीले बताइन्। उनले भनिन्, ‘विद्यालयले विद्यार्थीमा उक्त समस्या देखिएकोबारे पालिकालाई जानकारी गराएको थियो। त्यसपछि म आफैं उक्त विद्यालयमा पुग्दा पनि सोही समस्या देखियो। त्यसको समस्या समाधानका लागि पहल गर्छौं।’
यता स्वास्थ्य कार्यालय बैतडीका प्रमुख योगेशप्रसाद भट्टले विद्यार्थीहरू रुने, कराउने, काँप्ने, बेहोस हुने समस्या मास हिस्टेरियाले हुने गरेको बताए।
उनले भने, ‘शुरुमा कुनै एक विद्यार्थी मास हिस्टेरिया भएको र त्यसपछि अरूमा पनि देखिएको हो। शुरुमा देखिएको विद्यार्थी पत्ता लगाएर उपचार गर्न सके समस्या समाधान हुन्छ।’
विद्यार्थीमा यस्तो समस्या देखिन थालेपछि जिल्ला अस्पताल बैतडीका प्रमुख डाक्टर दीपेश श्रेष्ठ केही दिन विद्यालय बन्द गर्न सुझाव दिन्छन्। उनले भने, ‘शुरुमा एक विद्यार्थीमा यस्तो समस्या देखिने र बिस्तारै अरूमा पनि यस्तो लक्षण देखिन थाल्छ, विद्यालय बन्द गरेर भए पनि नियन्त्रण गर्न सकिन्छ।’
तपाईंको ईमेल गोप्य राखिनेछ ।