काठमाडौं : सरकारले नेपालमा लगानी गर्न स्वीस आफ्ना उद्यमी-व्यवसायीलाई आग्रह गरेको छ।
नेपाल–स्वीटजरल्याण्ड परामर्श संयन्त्रको बेर्नमा मंगलबार सम्पन्न बैठकमा परराष्ट्र मन्त्रालयका सहसचिव गणेशप्रसाद ढकालले आगामी महिना नेपालमा आयोजना हुने लगानी सम्मेलनमा सहभागिताका निम्ति आफ्ना उद्यमीलाई प्रोत्साहन गर्न स्वीस सरकारलाई आग्रह गरेका हुन्।
बैठकमा नेपाल-स्वीटजरल्याण्ड सम्बन्धका समग्र पक्षका साथै आर्थिक, विकास साझेदारी, बहुपक्षीय मञ्चमा सहयोग आदानप्रदान, मानवअधिकार तथा जलवायु परिवर्तनलगायत विश्वले सामना गर्नुपरेका सामयिक विषयमा पनि विचारविमर्श भएको थियो।
दुवै देशबीच उच्चस्तरीय भ्रमण आदानप्रदान, अतिकम विकसित मुलुकको सूचीबाट स्तरोन्नतिका निम्ति नेपालले गरेका प्रयास, दिगो विकास लक्ष्य हासिलमा भएका प्रगति, नेपाल–स्वीटजरल्याण्ड व्यापार, लगानी, पर्यटन, विज्ञान तथा प्रविधि र व्यावसायिक तालिमबारे बैठकमा छलफल भएको दूतावासले जनाएको छ।
नेपाली प्रतिनिधिमण्डलका प्रमुख सहसचिव ढकालले स्वीस सरकारको प्राथमिकतामा नेपाललाई राखिएकामा आभार व्यक्त गरे। स्वीस सरकारका प्रतिनिधि हेनरिच सेलेनवर्गले नेपालको विकास प्रयासमा स्वीस सरकारले निरन्तर सहयोग गर्ने प्रतिबद्धता जनाए।
पारस्परिक सहायताका सम्बन्धमा छलफल गर्न सन् २०१५ मा संयन्त्र स्थापना भएको हो । संयन्त्रको अर्को बैठक दुवै पक्षलाई अनुकूल हुने समयमा काठमाडौंमा हुने छ ।
तपाईंको ईमेल गोप्य राखिनेछ ।