म्याग्दी : विकट धवलागिरि गाउँपालिका-४ को खिवाङ गाउँ सडक सञ्जालमा जोडिएको छ। धवलागिरि गाउँपालिका भएर बग्ने म्याग्दी नदीमा निर्माणाधीन जलविद्युत् आयोजनाको लगानीमा खिवाङगाउँ सडक सञ्जालमा जोडिएको हो।
धवलागिरि गाउँपालिका-४ का वडाध्यक्ष याम घर्तीमगरले लामो छहरा केंकीबाट खिवाङ जोड्ने करिब तीन किलोमिटर सडक निर्माण भएको बताए। ‘खाम्ला–केङ्की-नाउरा हुँदै बगर जोड्ने मूल सडक निर्माण भइरहेको छ’, उनले भने, ‘केंकीबाट खिवाङ जोड्ने शाखा सडक निर्माण हालै पूरा भएको हो।’
सडक निर्माण भएपछि खिवाङका १८० घरपरिवार लाभान्वित भएका उनले बताए। सडकमा मोटरसाइकल, जीप र ट्रयाक्टर चल्न थालेका छन्।
६५ मेगावाट क्षमताको म्याग्दीखोला, ५३ मेगावाटको अपर म्याग्दी १ र ३७ मेगावाटको अपर म्याग्दीखोला जलविद्युत् आयोजनाको प्रवर्धक कम्पनीको संयुक्त लगानीमा खिवाङलाई सडक सञ्जालले जोडिएको गाउँपालिकाले जनाएको छ।
धवलागिरि गाउँपालिकाका अध्यक्ष प्रेमप्रसाद पुनले हालसम्म सडक नपुगेको खिवाङ गाउँलाई यातायात सञ्जालमा जोड्न निर्माणाधीन जलविद्युत् आयोजनासँग समन्वय गरिएको बताए। अपर म्याग्दी जलविद्युत् आयोजनाका संयोजक सुरेश घलेले सामाजिक सहयोग कार्यक्रमअन्तर्गत विकट गाउँ खिवाङ जोड्ने सडक निर्माण गरेको जानकारी दिए। गाउँपालिकाको सक्रियतामा खाम्ला हुँदै खिवाङ जोड्ने सडक पनि निर्माणाधीन छ।
जलविद्युत् आयोजनाले नाउरा हुँदै बगरगाउँ जोड्ने सडकको ट्र्याक खोल्ने कामलाई पनि अन्तिम चरणमा पुर्याएका गाउँपालिकाका उपाध्यक्ष रेशम पुन मगरले बताए।
तपाईंको ईमेल गोप्य राखिनेछ ।