काठमाडौँ : राष्ट्रिय प्रजातन्त्र पार्टीका सांसद पशुपति समशेर जबराले आगामी आर्थिक वर्षको बजेटले मन्दीतर्फउन्मुख अर्थतन्त्रलाई सुधार्न नसक्ने बताएका छन्।
आइतवारको प्रतिनिधिसभा बैठकमा २०८१ का विभिन्न शीर्षकमाथि जारी छलफलअन्तर्गत संघीय मामिला तथा सामान्य प्रशासन मन्त्रालय, ऊर्जा, जलस्रोत तथा सिँचाइ मन्त्रालय, अर्थ मन्त्रालयमाथि छलफलमा भाग लिँदै उनले यस्तो बताएका हुन्। उनले जिडिपीको वृद्धिदर सुस्त रहेको, मुद्रास्फिती उच्च रहेको र बेरोजगारी बढ्दो क्रममा रहेको अवस्थालाई मद्देनजर नगरी बजेट ल्याइएको बताए।
उनले सरकार र अन्ताराष्ट्रिय साझेदारहरूले यसको प्रभावलाई कम गर्न उपाय सुझाए पनि त्यसअनुसार बजेट नआएको बताए। उनले जनताको क्रयशक्ति धेरै घटेको बताए। आर्थिक मन्दीबाट देश कसरी बाहिर निकाल्ने भन्ने योजना बजेटमा नरहेको बताए।
जबराले भने, ‘जम्मै जिडिपीको वृद्धिदर सुस्त छ। मुद्रास्फिती उच्च छ। बेरोजगारी बढ्दो छ। महत्त्वपूर्ण राजस्व चुनौती छन् तर सुधार प्रक्रिया सुस्त छ। यसले मन्दीतर्फउन्मुख अर्थतन्त्रलाई सुधार्न सक्दैन। जनताको क्रय शक्ति स्वात्तै घटेको छ। सरकारले अहिलेको आर्थिक मन्दीलाई सम्बोधन गरेको देखिएन। आर्थिक मन्दीबाट देश कसरी बाहिर निकाल्ने केही पनि योजना छैन। अहिलेको बजेटमा यसको निराकरणका उपाय केही पनि लिएको छैन।’
उनले बजेट कल्पना र लहडमा ल्याइएको आरोप लगाए।
तपाईंको ईमेल गोप्य राखिनेछ ।