स्थानीय तह निर्वाचन तेस्रो चरण : प्रदेश नं. २ मा आज मतदान

राैतहटकाे चन्द्रपुर नगरपालिका ६ काे जनज्याेति बहुमुखी क्याम्पस मतदान केन्द्रमा मतपेटिका सिलबन्दी गरिँदै। फोटो : रमेश तिमल्सिना/थाहाखबर

रौतहटका निर्वाचन अधिकृत राजन श्रीवास्तवका अनुसार राैतहटमा ७५ प्रतिशत मत खसिसकेकाे छ। लाइनमा बसेकाहरुले मतदान गरिरहेकाले ८० प्रतिशतसम्म पुग्ने अनुमान गरिएको छ। बृन्दाबन नगरपालिकाको सखुअवा धमाैरा मतदान केन्द्रमा ८७ प्रतिशन मतदान भएको थाहा संवददाता रमेश तिमल्सिनाले जानकारी दिएका छन्। 

बाराको जितपुरसिमरा उपमहानगरपालिका २ स्थित प्राथमिक स्वास्थ्य केन्द्र सिमरा मतदान केन्द्रबाट चार जना र निजगढ–८ गौरीशकर मावि मतदान केन्द्रबाट एक जना किरियापुत्रीले मतदान गरेका छन्। जितपुर सिमरा ४, जगदम्बा बस्ने जितबहादुर श्रेष्ठ, राम श्रेष्ठ, लक्ष्मण श्रेष्ठ र कुमार श्रेष्ठले मतदान गरेका हुन् । श्रेष्ठका ४ दाजुभाइहरु बुबाको निधनपछि ४ दिनको किरियाकर्ममा थिए। फोटो : महेश्वर अधिकारी

स्थानीय तह निर्वाचन अन्तर्गत दुई नम्बर प्रदेशको बारा जिल्लामा ७० देखि प्रतिशत मतदान भएको छ। बाराको १६ वटा स्थानीय तहमा विहान ७ बजेदेखि साँझ ५ बजेसम्म भएको मतदानमा ७० देखि ७५ प्रतिशत मतदान भएको अनुमान गरिएको छ। मुख्य निर्वाचन अधिकृतको कार्यालयले दुई घण्टा पछि मात्र पूर्ण विवरण आउने जनाएको छ। 

पर्सा जिल्लामा ५ बजेसम्म ७० देखि ७२ प्रतिशत मतदान भएको छ। ५ बजेसम्म लाइनमा बसिसकेका मतदाताले अझै भोट खसालिरहेका छन्। केही केन्द्र बाहेक पर्साका अधिकांश स्थानीय तहमा मतदान सकिएको मुख्य निर्वाचनन अधिकृत बिष्णु सुवेदीलाई उधृत गर्दै थाहा संवाददाता विशाल सापकोटाले जानकारी दिएका छन्। 

प्रदेश नम्बर २ का ८ जिल्लामा स्थानीय तह निर्वाचन अन्तर्गत धेरै मतदान केन्द्रमा मतदान सकिएको छ। केही मतदान केन्द्रहरुमा भने लाइन बसेकाहरुले अझै मतदान गरिरहेका छन्। 

प्रदेश नं २ मा तेस्रो चरणको स्थानीय तह चुनावमा आज मतदान गरेर घर फर्किरहेको अवस्थामा एकजनाको बीच बाटोमै मृत्यु भएको छ।  धनुषाको बटेश्वर गाउँपालिकामा मतदान गरेर घर फर्किरहेका बटेश्वर गाउँपालिका–१ का अन्दाजी ५५ वर्षीय योगेन्द्र सिंहको मृत्यु भएको सरकारी समाचार संस्था राससले जनाएको छ।

 

धनुषामा ३ बजे सम्म करिब ६० प्रतिशत मत खसेको मुख्य निर्वाचन अधिकृतको कार्यालय जनकपुरलाई उधृत गर्दै थाहा संवाददाता गोविन्द महतोले जानकारी दिएका छन्। 

पर्सा जिल्लामा दिउँसो ३ बजेसम्म ६० देखि ६५ प्रतिशत मतदान भएको मुख्य निर्वाचन अधिकृतको कार्यालयलाई उधृत गर्दै थाहा संवाददाता विशाल सापकोटाले जानकारी दिएका छन्। 

स्थानीय तहको तेस्रो चरणको निर्वाचनमा प्रदेश नं. २ का आठ जिल्लाका १३६ वटा स्थानीय तहमा जारी मतदानमा दिउँसो १ बजेसम्म करिव ५३ प्रतिशत मतदान भएको निर्वाचन आयोगले जनाएको छ।

सिरहामा दिउँसो २ बजेसम्म ४५ प्रतिशत मतदान भएको छ। जिल्लाका सबै स्थानीय तहमा शान्तिपूर्ण रुपमा मतदान भइरहेको थाहा संवाददाता मणिलाल विश्वकर्माले जानकारी दिए।

सप्तरीको राजविराज नगरपालिका वडा नम्बर १५ को देउरीभरुवामा राष्ट्रिय जनता पार्टीका वडाअध्यक्षका उम्मेदवार महन्थी यादवको मृत्यु भएपछि स्थगित मतदान असोज ५ गते हुने भएको छ। अन्य वडामा भने शान्तिपूर्ण मतदान भइरहेको मुख्य निर्वाचन अधिकृत शारदाप्रसाद कोइरालाई उधृत गर्दै थाहा संवाददाता मणिलाल विश्वकर्माले जानकारी दिए।

पर्सामा दिउँसो १ बजेसम्ममा ५० प्रतिशतभन्दा बढी मतदान भइसकेको मुख्य निर्वाचन अधिकृत विष्णु सुवेदीलाई उद्धृत गर्दै थाहा संवाददाता विशाल सापकोटाले जनाएका छन्।

महोत्तरीको सोनारा गाउँपालिका वडा नम्बर ८ का वडाअध्यक्षका स्वतन्त्र उम्मेदवार राजदेव यादवमाथि फोरम कार्यकर्ताद्वारा कुटपिट। भोट हाल्न लाइन बसेका क्रममा मत मागेका कारण उनलाई कुटपिट गरेको जनाइएको छ। कुटपिट गर्ने सरोज यादव र राजीव यादवलाई पक्राउ गरिएको एसपी कुबेर कडायत जानकारी दिएका छन्।

महोत्तरीको सोनारा गाउँपालिका अध्यक्षका स्वतन्त्र उम्मेदवार राजदेव यादवमाथि फोरम कार्यकर्ताद्वारा कुटपिट। भोट हाल्न लाइन बसेका क्रममा मत मागेका कारण उनलाई कुटपिट गरेको जनाइएको छ। कुटपिट गर्ने सरोज यादव र राजीव यादवलाई पक्राउ गरिएको एसपी कुबेर कडायत जानकारी दिएका छन्।

शहरी विकास मन्त्री प्रभु साह रौतहटको माैलापुर नगरपालिका ५ मा मतदान गर्दै। फोटो : रमेश तिमल्सिना/थाहाखबर

पर्सामा १२ बजेसम्म करिब ४० प्रतिशत मतदान भएको मुख्य निर्वाचन अधिकृत विष्णु सुवेदीले जानकारी दिएका छन्। पर्साको सबै १४ वटै स्थानीय तहमा शान्तिपूर्ण रुपमा मतदान भइरहेको उनले जानकारी दिए।

बाराको जितपुर सिमरा उपमहानगरपालिकामा एक वृद्धलाई बोकेर मतदानस्थलतर्फ लगिँदै। फोटो : महेश्वर अधिकारी

बाराको जितपुर सिमरा उपमहानगरपालिकामा मतदान गर्न मतदानस्थलतर्फ जाँदै एक वृद्ध। फोटो : महेश्वर अधिकारी

रौतहटको मौलापुर नगरपालिका ३ प्रावि गम्हरिया पतौरा मतदान केन्द्रमा नेकपा माओवादी केन्द्र र संघीय समाजवादी फोरम नेपालका कार्यकर्ताबीच झडप भएको छ।  झडपपछि आधा घण्टा स्थगित भएको मतदान केहीबेरअघि सुरु भएको रौतहटबाट थाहा संवाददाता रमेश तिमल्सिनाले जानकारी दिएका छन्।

वीरगञ्ज महानगरपालिका वडा नम्बर- २ किशनलाल माध्यमिक विद्यालय केन्द्रमा मतदानका लागि आएकी एक वृद्धा।

वीरगञ्ज महानगरपालिका वडा नम्बर- २ किशनलाल माध्यमिक विद्यालय केन्द्रमा मतदानका लागि आएकी एक वृद्धा।

निर्वाचन आयोगले प्रदेशन नम्बर २ का १३६ स्थानीय तहमा शान्तिपूर्ण रुपमा मतदान भइरहेको जनाएको छ। हेर्नुहोस् विज्ञप्ति :

राष्ट्रपति विद्यादेवी भण्डारीले एक विज्ञप्ति जारी गर्दै तेस्रो चरणको स्थानीय तहको निर्वाचनमा उत्साह र उमङ्गका साथ सहभागी भई संविधानप्रदत्त बालिग मताधिकार प्रयोग गर्न आम मतदातालाई आग्रह गरेकी छन्।

वीरगञ्ज महानगरपालिका वडा नम्बर- २ स्थित किशनलाल माध्यमिक विद्यालय केन्द्रमा मतदानका लागि जाँदै अपाङ्ता भएका एक मतदाता।

रौतहटको गौर नगरपालिकास्थित जानकी कन्या प्राथमिक विद्यालय केन्द्रमा मतदान गर्दै एमाले नेता एवम् पूर्वप्रधानमन्त्री माधवकुमार नेपाल।
तस्बिर : रामकृष्ण अधिकारीको फेसबुकबाट

वीरगञ्ज महानगरपालिका वडा नम्बर- ३ छपकैया स्थित मालपोत मतदान केन्द्रमा मत खासाल्दै राजपाका तर्फबाट महानगर प्रमुखका उम्मेदवार राजेशमान सिंह।

वीरगञ्ज महानगरपालिका वडा नम्बर- २ स्थित किशनलाल माध्यमिक विद्यालय केन्द्रमा मतदानका लागि लाइन लागेका मतदाता।

प्रमुख निर्वाचन आयुक्त डा. अयोधिप्रसाद यादवले सप्तरीको राजविराज नगरपालिका वडा नं. २ स्थित आधारभूत विद्यालय मतदान केन्द्रमा पुगी बिहान ७ बजे मतदान गरेका छन्। सो केन्द्रमा मतदानको सुभारम्भ प्रमुख आयुक्त यादवले नै गरेका थिए।

पर्साका १ महानगरपालिका, ३ नगरपालिका र १० गाउँपालिका गरी १४ स्थानीय तहमा शान्तिपूर्ण वातावरणमा मतदान भइरहेको छ। वीरगञ्ज महानगरपालिका वडा नम्बर ३ मा रहेको मालपोत कार्यालय मतदान केन्द्रबाट ८७ वर्षीय वृद्ध असलम अन्सारीले मतदान गरी आफ्नो मताधिकारको प्रयोग गरेका छन्।

सिरहाको लहान नगरपालिका वडा नम्बर १० स्थित ग्रामीण सभाहल मतदान केन्द्र ।

सप्तरी, सिरहा, धनुषा, महोत्तरी, सर्लाही, रौतहट, बारा र पर्साका कुल १३६ स्थानीय तहमा बिहान ७ बजेदेखि नै मतदान भइरहेको छ। प्रदेश नं. २ मा एक महानगरपालिका, ३ उपमहानगरपालिका, ७३ नगरपालिका र ५९ गाउँपालिका छन्। बाँकी ६ वटा प्रदेशमा दुई चरणमा गरेर निर्वाचन भइसकेको छ।

स्थानीय तह निर्वाचनको तेस्रो चरणअन्तर्गत प्रदेश नम्बर २ का ८ जिल्लामा आज मतदानको दिन, थाहा खबरको लाइभ अपडेटमा स्वागत छ।