काठमाडौं : प्रवासी नेपाली एकता मञ्च, अष्ट्रेलियाले नेपाललाई भेन्टिलेटर एक थान र पाँच थान १० लिटर क्षमताको अक्सिजन कन्सन्ट्रेटर समेत सहयोग गरेको छ।
नेपालमा कोभिड १९ कोरोना भाइरसको दोस्रो उछालसँगै एकैपटक अस्पतालहरुमा धेरै बिरामीको चाप हुँदा अक्सिजन लगायतको अभावले ग्रस्त बनेको बेला विदेशमा बस्ने नेपालीहरूले सहयोग गरेका हुन्।
मञ्चका अध्यक्ष रमेश पाण्डेद्वारा हस्ताक्षरित विज्ञप्तिमा भनिएको छ, ’ यो दुःखद घडीमा हातेमालो गर्दै हामीले छोटो समयमा नै करिब ४६ हजार अष्ट्रेलियन डलर सहयोग संकलन गरेका छौं। अहिले नेपालमा अक्सिजन प्लान्ट स्थापना गर्नका लागि हामीले (अष्ट्रेलिया र न्युजिल्याण्ड) २५ हजार अष्ट्रेलियन डलर सहयोग गरेको अवगत गराउन पाउँदा निकै खुशी लागेको छ।
यस्तै १५ हजार डलर पर्ने भेन्टिलेटर एक थान र पाँच थान १० लिटर क्षमताको अक्सिजन कन्सन्ट्रेटर (६ हजार डलर बराबर) को समेत प्रवासी नेपाली एकता मञ्च अष्ट्रेलियाको तर्फबाट नेपालमा सहयोग गरेको सबैमा जानकारी गराउन चाहन्छौं।‘
त्यस्तै, मञ्चले ५० क्वीविक मिटरको यो अक्सिजन प्लान्ट चीनमा खरिद भई त्यसको प्राविधिक परीक्षणको अवस्थामा रहेको बताएको छ। छिटोभन्दा छिटो यसलाई नेपालमा पठाई नेपाल सरकारलाई हस्तान्तरण गर्ने मञ्चको भनाइ छ।
हाललाई अष्ट्रेलियामा रहेका नेपालीहरूसँग सहयोग संकलनको कार्य स्थगित गरिएको पनि मञ्चले जनाएको छ।
तपाईंको ईमेल गोप्य राखिनेछ ।