विराटनगर : उम्मेदवार छनोटको विषय पेचिलो बनेपछि नेपाली कांग्रेसको १४ औँ महाधिवेशन अन्तर्गत प्रदेश १ को उद्घाटन समारोह स्थगित भएको छ।
नेतृृत्व चयनका लागि नेताहरूले उम्मेदवार तय गर्न सकस भएपछि बिहीबार दिउँसो २ बजे हुने भनिएको उद्घाटन सत्र शुक्रबार बिहानसम्मका लागि स्थगन भएको हो।
उद्घाटन सत्रमा सहभागी हुन प्रतिनिधिहरू कार्यक्रमस्थलमा उपस्थित भएको करिब साढे २ घण्टापछि कांग्रेस नेता कृष्णप्रसाद सिटौलाले उद्घाटन स्थगित भएको जानकारी दिए।
उम्मेदवार छनोटका लागि संस्थापन पक्ष र संस्थापनइतर दुवै पक्ष छुट्टाछुट्टै स्थानमा बैठक बसिरहेको र नेताहरू छलफलमा व्यस्त भएकाले उद्घाटन एक दिन सारेपछि प्रतिनिधिहरू फर्किएका छन्।
कांग्रेसको संस्थापनइतर पक्षले गुरूराज घिमिरेलाई सभापतिको उम्मेदवार बनाएको छ। सभापतिका दाबेदार राजीव कोइराला र घिमिरे थिए।
तर, बिहीबार संस्थापन इतर पक्षले कोइरालालाई ब्याक गर्दै घिमिरेलाई अघि सारेको छ।
घिमिरेको प्रतिस्पर्धा संस्थापन पक्षका उम्मेदवार उद्धव थापासँग हुनेछ।
तपाईंको ईमेल गोप्य राखिनेछ ।