काठमाडौं : प्रधानमन्त्रीसमेत रहेका नेपाली कांग्रेसका सभापति शेरबहादुर देउवाले पार्टीको महाधिवेशनमा आफ्नो पक्षको पदाधिकारी उम्मेदवार चयन गर्नका लागि आफूनिकट नेताको बैठक बुधबार बोलाएका छन्।
उनले बूढानीलकण्ठस्थित आफ्नै निवासमा पदाधिकारीका उम्मेदवार छान्न बिहान ९ बजे बैठक डाकेका हुन्।
१४ औं महाधिवेशनमा संस्थापन पक्षको उम्मेदवार प्यानल बनाउन बैठकमा छलफल हुने कांग्रेससम्बद्ध स्रोतले जानकारी दियो।
सभापतिमा देउवाले आफू उम्मेदवार हुने यसअघि नै बताइसकेका छन्।
२ जना उपसभापतिको व्यवस्था रहेको कांग्रेसमा यसका लागि देउवा पक्षका ४ नेताले दाबी गरिरहेका भए पनि हालका उपसभापति विजयकुमार गच्छदार र महामन्त्री पूर्णबहादुर खड्का मुख्य दाबेदार मानिएका छन्।
संस्थापन पक्षबाट महामन्त्रीमा हाल सह-महामन्त्री रहेका प्रकाशशरण महत, गृहमन्त्री बालकृष्ण खाँण, सञ्चारमन्त्री ज्ञानेन्द्र कार्की, नेताहरू एनपी साउद, रमेश लेखक र प्रवक्ता विश्वप्रकाश शर्माको मुख्य दाबेदारी रहेको छ।
कांग्रेसमा सह-महामन्त्रीका दलिततर्फ देउवा समूहबाट मानबहादुर विश्वकर्मा, मीनबहादुर विश्वकर्मा, लक्ष्मी परियार र सुजाता परियार दाबेदारी रहेको छ। जसमध्ये पनि प्रमुख दाबेदार भने मानबहादुर र मीनबहादुर नै रहेका छन्।
मुस्लिम कोटाको सह-महामन्त्रीमा देउवा समूहभित्रै चर्को प्रतिस्पर्धा छ। संस्ठापन समूहबाटै केन्द्रीय सदस्य फर्मुल्ला मन्सुर र अत्तहर कमाल मुसलमानबीच प्रतिस्पर्धा छ। महिलातर्फको सह-महामन्त्रीमा संस्थापन पक्षका धेरै आकांक्षी छन्।
चित्रलेखा यादव, पुष्पा भुसाल, डीना उपाध्याय, डा. डिला संग्रौला, ईश्वरी न्यौपाने र अम्बिका बस्नेतलगायत सह-महामन्त्रीका दाबेदार देखिएका छन्।
यसैगरी आदिवासी जनजातितर्फ सह-महामन्त्रीमा संस्ठापन पक्षका भीष्मराज आङ्देम्बे, चीनकाजी श्रेष्ठ र बहादुर लामा प्रमुख दाबेदार हुन्।आङदेम्बेले उम्मेदवारीको घोषणा गरिसकेका छन्।
मधेसीतर्फ सह-महामन्त्री छनोट गर्न पनि सभापति देउवालाई कठिन भएको छ।
उनको समूहमा महेन्द्र यादव, अजय चौरासिया, महेश चौरसिया, जंगीलाल राय र रामसरोज यादव सह-महामन्त्रीका लागि मुख्य आकांक्षी मानिएका छन्।
थारु सह-महामन्त्रीमा संस्थापन समूहका रामजनम चौधरी र योगेन्द्र चौधरीको नाम अगाडि छ।
पिछडिएको क्षेत्रबाट चुनिने एक सह-महामन्त्रीका लागि संस्थापनका केन्द्रीय सदस्य जीवनबहादुर शाही र पूर्वसांसद राजीवविक्रम शाहीको नाम चर्चामा छ।
तपाईंको ईमेल गोप्य राखिनेछ ।