व्याख्यात्मक टिप्पणी भन्नुको केही अर्थ छैन : नारायणकाजी
व्याख्यात्मक टिप्पणी भन्नुको केही अर्थ छैन : नारायणकाजी
काठमाडौं : पाँच दलीय गठबन्धनमा रहेको नेकपा माओवादी केन्द्र अमेरिकी सहयोग परियोजना एमसिसीको पक्षमा उभिने निर्णयप्रति नेताहरूले असन्तुष्टि व्यक्त गरेका छन्।
पाँच दलीय गठबन्धनले व्याख्यात्मक घोषणासहित एमसिसी सम्झौता अनुमोदन गर्ने निर्णयप्रति माओवादी केन्द्रका नेता नारायणकाजी श्रेष्ठले असन्तुष्टि जनाएका छन्।
उनले ट्वीटरमा लेखेका छन्, ‘५ दलीय गठबन्धनमा अध्यक्ष क. प्रचण्डले व्याख्यात्मक घोषणासहित एमसिसी सम्झौता अनुमोदन गर्ने जानकारी गराउनु भएको छ। यो निर्णयप्रति मेरो गम्भीर असहमति र आपत्ति रहेको छ।’
उनले आज बिहानको पार्टीको छलफलमा आफूलगायत केही नेताहरूले मतभेद राखिसकेको बताएका छन्। माओवादीको आजको निर्णयले महाधिवेशनको विरुद्ध भएकाले गलत भएको उनको ठहर छ।
५ दलीय गठबन्धनमा अध्यक्ष क• प्रच्ण्डले ब्याख्यात्मक घोषणा सहित एमसिसि सम्झौता अनुमोदन गर्ने जानाकारी गराउनु भएको छ ।यो "निर्णय"प्रति मेरो गम्भीर असहमति र आपत्ति रहेको छ।आज बिहानको पार्टीको छलफलमा म लगायत केही कमरेडहरुले मतभेद राखि सकेका छौं। यो महाधिवेशनको बिरुध्द छ र गलत छ ।
— NKShresthaPrakash (@nksthaprakash) February 27, 2022
यस्तै, एमसिसी अनुमोदनको पक्षमा उभिने निर्णयप्रति आफूहरुले गम्भिर असन्तुष्टि राखेको अर्का नेता लीलामणि पोखरेल बताउँछन्।
उनी भन्छन्, ‘एमसिसीमा धेरै राष्ट्रहितविपरित बुँदा छन्। अहिले व्याख्यात्मक टिप्पणीसहित एमसिसी अनुमोदन गर्ने भनिएको छ। यसले सम्झौतामा कुनै असर गर्दैन। त्यसैले त्यसको कुनै अर्थ छैन।’
पार्टीभित्र आफूहरुले यसको विरुद्ध चर्को आवाज उठाएको समेत बताए।
एमसिसी अनुमोदन गर्ने निर्णयप्रति माओवादी शिर्ष नेताहरु नारायणकाजी श्रेष्ठ, लीलामणि पोखरेल, देव गुरुङ, गिरिराजमणि पोखरेल र कृष्णबहादुर महरा लगायतले असन्तुष्टि जनाइरहेका छन्।
तपाईंको ईमेल गोप्य राखिनेछ ।