धनगढी : नेकपा एमालेले संसदीय चुनावलक्षित चुनावी अभियान सुदूरपश्चिमको दार्चुलाबाट थाल्ने भएको छ। कात्तिक १८ गते दार्चुलाबाट एमाले अध्यक्ष केपी शर्मा ओलीले राष्ट्रव्यापी चुनावी अभियान शुरु गर्ने भएका हुन्।
चुनावलक्षित राष्ट्रव्यापी चुनावी अभियानको पहिलो आमसभा दार्चुलामा हुने एमाले सुदूरपश्चिमका अध्यक्ष दामोदर भण्डारीले जानकारी दिए।
उनले भने, ‘१८ गते दार्चुलाबाट आमसभा उद्घाटनपछि क्रमशः अन्य ठाउँमा पनि सभाहरु हुनेछन्।’ उनका अनुसार १८ गते नै बैतडी र कञ्चनपुरमा पनि चुनावी आमसभा हुने तय भएको छ।
सबै ठाउँका आमसभालाई ओलीले सम्बोधन गर्नेछन्। एमालेले भारतद्वारा अतिक्रमित भूमि लिपुलेक, लिम्पियाधुरा, कालापानी समेटिएको दार्चुलाबाट चुनावी अभियान शुरु गर्न लागेको हो।
ओली नेतृत्वको सरकारले भारत अतिक्रमित कालापानी क्षेत्र समेटेर नेपालको नक्सा जारी गरेको थियो।
यही विषयलाई चुनावमा जनतासामु लगेर ‘चुच्चे नक्साले ओगटेको भूभाग फिर्ता ल्याउने’ भन्दै मत माग्न एमालेले यहाँबाट अभियान थालनी गर्न लागेको एमाले दार्चुलाले जनाएको छ।
ओली चुच्चे नक्साले जारी भएपछि पहिलोपटक दार्चुला जान लागेका हुन्। यसअघि ०७० सालको चुनावमा गोकुलेश्वरमा आयोजना भएको आमसभालाई सम्बोधन गर्न ओली त्यहाँ पुगेका थिए।
तपाईंको ईमेल गोप्य राखिनेछ ।