धनकुटा : प्रतिनिधिसभा र प्रदेशसभा निर्वाचन गराउन १ हजार ३ सय १२ जना कर्मचारी खटिने भएका छन्। मुख्य निर्वाचन अधिकृतको कार्यालयले दिएको जानकारीअनुसार आगामी मंसिर ४ गते हुन लागेको प्रतिनिधीसभा तथा प्रदेशसभा निर्वाचनका १ सय ६४ मतदान स्थलमा सो कर्मचारी खटिने भएका हुन्।
जसमा ६५३ शिक्षक रहेका छन् भने बाँकी कर्मचारी रहेका छन्। गएको स्थानीय तहको निर्वाचनमा शिक्षकलाई निर्वाचनमा खटाइएको थिएन। यसपटक भने प्राथमिक तहका स्थायी शिक्षकलाई खटाउन लागिएको जिल्ला निर्वाचन अधिकारी जयराम श्रेष्ठले जानकारी दिए।
धनकुटामा १ लाख १६ हजार ९ सय ९१ मतदाता सहभागी हुने निर्वाचनमा १ सय ६२ स्थायी र २ अस्थायी गरी १ सय ६४ मतदान स्थल रहेका छन्। अस्थायी मतदान स्थलमा कैदीबन्दीका लागि जिल्ला कारागारमा र निर्वाचनमा नखटिने कर्मचारी, शिक्षक, सेना, प्रहरीका लागि गोकुण्डेश्वर माविमा मतदान स्थल कायम गरिएको छ।
एउटा मतदानस्थलमा ८ जना कर्मचारी खटाइने भएको छ। प्रत्येक मतदान स्थलमा मतदान अधिकृत एक, सहायक मतदान अधिकृत एक, सहायक कर्मचारी ५ र सहयोगी एक जना खटिनेछन्। मतदाता संख्याको आधारमा बढीमा ३ जनासम्म स्वंसेवक परिचालन हुने छन्। ती स्वंसेवक भने स्थानीयलाई खटाइने मुख्य निर्वाचन अधिकृतको कार्यालयका सूचना अधिकारी राजन बास्तोलाले जानकारी दिए।
प्रतिनिधीसभाका लागि एक र प्रदेशसभाका लागि दुई निर्वाचन क्षेत्र रहेको धनकुटामा प्रतिनिधीसभा ७ जना तथा प्रदेशसभा निर्वाचन क्षेत्र क मा ४ जना र प्रदेश सभा निर्वाचन क्षेत्र ख मा ७ जना उम्मेदवार रहेका छन्।
निर्वाचनमा खटिने मतदान अधिकृत र सहायक मतदान अधिकृतका लागि कार्तिक २५ गते नियुक्ति पत्र प्रदान गरिने र २८ र २९ गते तालिम दिइने मुख्य निर्वाचन अधिकृतको कार्यालयका सूचना अधिकारी बास्तोलाले बताए। तालिम पछि कर्मचारीहरु मंसिर १ गते सम्बन्धित मतदान स्थलमा पुगिसक्ने कार्यक्रम रहेको उनले जानकारी दिए।
तपाईंको ईमेल गोप्य राखिनेछ ।