पर्वत : गोरखाको पालुङटार नगरपालिका–३ स्थित आँपपिपलमा रहेको आँपपिपल हस्पिटलमा पाटन अस्पतालको टोलीले महिलाहरूको पाठेघर तथा स्तन क्यान्सर सम्बन्धी विशेषज्ञ चिकित्सहरुले ‘स्क्रिनिङ क्याम्प’ सञ्चालन गरेको छ।
ग्रामीण क्षेत्रमा क्यान्सरबारे चेतना फैलाउने उद्देश्यले ‘क्याम्प’ सञ्चालन गरेको पाटन अस्पतालमा कार्यरत पाठेघर तथा स्तन क्यान्सर विशेषज्ञ डा. अरुण शाहीले बताए।
‘महिलाको पाठेघर र स्तनमा हुने क्यान्सरको बारेमा सचेतना फैलाउनु आवश्यक छ। नेपालमा क्यान्सरका कारण दैनिक करिब ४०/५० जनाको मृत्यु हुने गरेको र त्यसमा पनि पाठेघरको मुखमा हुने क्यान्सरले दैनिक करिब छ जनाको मृत्यु हुने गरेको छ’, उनले भने, ‘कम्तीमा पनि स्क्रिनिङ गर्न सकियो भने जोखिममा रहेका वा सुरुवाती चरणमा रहेकाहरूको उचित उपचार हुन्छ। सचेतनाकै लागि भनेर हामीले यो क्याम्प चलाएका हौँ।’
पाटन स्वास्थ्य विज्ञान प्रतिष्ठान, इनोभेटीभ फाउन्डेसन फर हेल्थ एन्ड रिसर्च र एनआरएनए नन रेसिडेण्ट नेपाली एसोसिएसन (एन.आर.एन.ए) को सहयोगमा ‘क्याम्प’ चलाइएको हो। परीक्षणका लागि आएकामध्ये एक सय जनाको पाठेघरको पानीको जाँच (प्याप स्मेयर टेस्ट) र बाँकी रहेकाहरूको भिजुअल इन्सपेक्सन विथ एसिटीक एसिड (भीआईए) विधिबाट परीक्षण गरिएको थियो।
पाटन अस्पतालबाट डा. शाही सहित महिला तथा प्रसूति रोग विशेषज्ञ डा.अल्का यादव सहित १० जना चिकित्सकको टोलीले परीक्षण गरेको थियो। आँपपिपल अस्पतालकी मेडिकल सुपरिटेन्डेन्ट डा.सन्नी कुमारी साह, सञ्चालक समिति सदस्य डा. गुणराज लोहनी लगायतले पनि शिविर व्यवस्थापन सहकार्य गरेका थिए।
क्याम्पमा परीक्षण गरिएका ३०० मध्ये १० जनामा क्यान्सरको सम्भावना देखिएको बताउँदै डा. शाहीले ‘स्क्रिनिङ’ गरिएका सबै ‘रिपोर्ट’ हरुको नतिजा आइपुग्न दुई हप्ता लाग्ने बताए।
गाउँमै आएर त्यो पनि निःशुल्क रूपमा क्यान्सरको परीक्षण गरिदिँदा आफूहरूलाई खुशी मिलेको स्वास्थ्य परीक्षणको लागि आएकी आँपपिपल भन्ज्याङकी ५० वर्षीया दिलमाया थापाले बताइन्।
तपाईंको ईमेल गोप्य राखिनेछ ।