खजुरा : नेपालगञ्जस्थित भेरी अस्पतालमा रेबिज रोगविरुद्धको खोप नहुँदा सर्वसाधारण मर्कामा परेका छन्।
सरकारले निःशुल्क उपलब्ध गराउँदै आएको रेबिजविरुद्धको खोप भेरी अस्पतालमा गत चैत २२ गतेदेखि सकिँदा सर्वसाधारण चर्को मूल्य तिरेर निजी मेडिकल धाउन बाध्य भएका छन्।
विपन्न तथा गरिब परिवारका सर्वसाधारणले निजी मेडिकलबाट चर्को मूल्यमा रेबिजविरुद्धको खोप किन्नुपर्दा मर्का परेको बताएका छन्।
“दैनिक ज्याला मजदुरी गरेर परिवारको पेट पाल्दै आएको छु, कुकुरले टोकेपछि निःशुल्क सुई पाइन्छ भनेर यहाँ आएँ, तर यहाँ सुई छैन, किनेर ल्याउन भने”, कुकुरले टोकेपछि खोप लगाउन भेरी अस्पताल आएका नेपालगञ्ज उपमहानगरपालिका–१७ परसपुरका ४१ वर्षीय यासिन अलीले भने, “मजस्तो दैनिक ज्यालादारी गरेर जीवन चलाउने मान्छे महँगोमा सुई किनेर लगाउन पर्दा मर्कामा छु।”
अलीले अस्पतालबाहिर मेडिकलबाट रेबिजविरुद्धको एउटा खोपको ६२५ रुपैयाँ तिरेर किनेको बताए। निःशुल्क सरकारले प्रदान गर्ने खोप सर्वसाधारणले यति धेरै मूल्यमा किन्नुपर्दा मर्कामा परेको उनको भनाइ छ।
राजापुर नगरपालिका–९ इश्वरीगञ्ज बर्दियाका हरिलाल थारुले पनि त्यति टाढाबाट नेपालगञ्ज आउँदा पनि निःशुल्क खोप नपाउँदा दुःख लागेको बताए।
अस्पतालको एआरभी विभागमा कुकुर बिरालोले टोकेका दैनिक एक सयभन्दा बढी सर्वसाधारण रेबिजविरुद्धको खोप लगाउन आउने गरेका छन्।
“दैनिक ४० देखि ५० जना नयाँ विरामी आउँछन्, त्यति नै सङ्ख्यामा पुराना विरामी पनि आउँछन, दैनिक कुकुरले टोकेका सयभन्दा बढी विरामी यहाँ आउँछन्” भेरी अस्पतालका एआरभी विभागका सिनियर अहेब कृष्णबहादुर बुढाथोकीले भने, “अस्पतालमा खोप छैन, सबैलाई बाहिरबाट किनेर ल्याउन भन्छौँ।”
उनका अनुसार गत चैत २२ गतेदेखि नै अस्पतालको एआरभी विभागमा रेबिजविरुद्धको खोप सकिएको छ। कुकरले टोकेपछि रेबिजविरुद्ध तीनवटा खोप लगाउनुपर्ने उनले बताए।
अस्पतालमा रेबिजविरुद्धको खोप प्रदेश आपूर्ति केन्द्र र इपिडिमियोलोजी तथा रोग नियन्त्रण महाशाखाबाट आउने गरेको र हाल सो स्थानमा पनि मौज्दात शून्य भएको जानकारी प्राप्त भएको अस्पताल प्रशासनले जनाएको छ।
तपाईंको ईमेल गोप्य राखिनेछ ।