काठमाडौँ : मांसपेशी कमजोर बनाउने जटिल रोग मस्कुलर डिष्ट्रोफीको पहिचान, उपचार, रोकथाम एवं पुनर्स्थापनाका लागि दीर्घकालिन नीति तथा कार्ययोजना तयार गर्न स्वास्थ्य तथा जनसंख्यामन्त्री प्रदीप पौडेलले वरिष्ठ कन्सल्ट्यान्ट तथा न्युरोलोजिष्ट प्राडा जगदीशप्रसाद अग्रवाल संयोजकत्वको सुझाव समिति गठन गरेका छन्।
समितिका सदस्यहरुमा त्रिवि शिक्षण अस्पतालका प्राडा रोहितकुमार पोखरेल, मस्कुलर डिस्ट्रोफी फाउण्डेसन नेपालका अनिलकुमार उपाध्याय, त्रिवि शिक्षण अस्पतालकी प्राडा मिता शाह राना तथा मन्त्रालयका नीति योजना महाशाखा प्रमुख डा. कृष्णप्रसाद पौडेल सदस्य छन्।
मांसपेशी कमजोर बनाएर हिँडडुल तथा आवतजावतमै समस्या पार्ने आनुवंशिक रोगका विरामी देशमा बढिरहेको मन्त्रालयको तथ्यांकमा छ। रोकथाम तथा विरामी र परिवारलाई पुनर्स्थापना आवश्यक पर्ने भएकाले यसका लागि आवश्यक नीति तथा कार्यक्रम तयार पार्न समितिलाई जिम्मेवारी प्रदान गरिएको मन्त्रालयका प्रवक्ता डा. प्रकाश बुढाथोकीले जानकारी दिए।
नेपालमा हाल ८ सय यस्ता विरामी रहेको पाइएको छ। आनुवांशिक कारणबाहेक अन्यमा समेत देखा पर्ने जटिल प्रकृतिको रोगको गर्भावस्थामा हुने आनुवंशिक परीक्षणमार्फत ९५ प्रतिशत विरामी पत्ता लगाउन सकिने चिकित्सकहरु बताउँछन्।
यो रोग भएका बालबालिका तथा परिवार अतिरिक्त सेवा, विशेष सहयोग र मनोवैज्ञानिक सघनताको आवश्यकता पर्छ। समितिलाई रोग रोकथाम तथा परिवार र स्वास्थ्यकर्मीलाई जानकारी दिन सचेतनामूलक कार्यक्रम तयार पार्ने तथा सामाजिक पुनर्स्थापना तथा आत्मनिर्भरताका लागि कार्यक्रम तयार पार्ने योजना मन्त्रालयलाई बुझाउने कार्यादेश दिइएको छ।
तपाईंको ईमेल गोप्य राखिनेछ ।