बैतडी : आगामी स्थानीय निर्वाचनमा बैतडीका १२९ मतदानस्थलमध्ये ३१ वटा मतदानस्थललाई अतिसंवेदनशील सूचीमा राखिएको छ । जिल्ला प्रशासन कार्यालयले सुरक्षा दृष्टिकोणले मतदानस्थललाई वर्गीकरण गरेअनुसार यहाँका ३१ मतदानस्थल अतिसंवेदनशील राखिएका हुन्।
जिल्लामा रहेका १२९ मतदानस्थललाई अतिसंवेदनशील, संवेदनशील र कम संवेदनशील गरी तीन भागमा वर्गीकरण गरिएको हो।
जिल्ला प्रशासन कार्यालयका सूचना अधिकारी खगेन्द्र भारतीका अनुसार जिल्लाका अन्य ३४ मतदानस्थल संवेदनशील र ६४ ओटा मतदानस्थल कम संवेदनशीलको सूचीमा रहेका छन्। केन्द्र विवाद, विगतको निर्वाचनको समीक्षा, सञ्चार, यातायातको पहुँच र विभिन्न राजनीतिक दलको प्रभावजस्ता विषयहरूलाई आधार मानेर निर्वाचनस्थल र केन्द्रका लागि सुरक्षा संवेदनशीलता तयार पारिएको उनले बताए।
मतदान केन्द्र, मतदानस्थल, निर्वाचन अधिकृतको कार्यालय, मतदाता, उम्मेदवार सबैको सुरक्षाको प्रत्याभूति हुने गरी सुरक्षा योजना तयार गरिएको सूचना अधिकारी भारतीको भनाइ छ। उनले भने, ‘मतदानस्थलको संवेदनशीलता हेरेर सुरक्षा योजना बनाइरहेका छौं। त्यही अनुसार सुरक्षानिकाय परिचालन हुनेछन्। सुरक्षायोजनालाई थप प्रभावकारी बनाउन स्थलगत अध्ययन र अनुगमन समेत भइरहेको छ।’
अति संवेदनशीलमा कम्तीमा ११, संवेदनशीलमा कम्तीमा ९ र कम संवेदनशीलमा कम्तीमा ८ जना सुरक्षाकर्मी परिचालन गरिने जनाइएको छ।
१० वटा स्थानीय तह रहेको बैतडीमा २०५ मतदान केन्द्र रहेका छन्। जिल्लामा १ लाख ४८ हजार ६०६ मतदाता रहेका जिल्ला निर्वाचन कार्यालयले जनाएको छ। वैशाख ३० गते हुने स्थानीय निर्वाचनका लागि बैतडीमा १५ दल दर्ता भएका छन्। दलहरुले चुनावी प्रचारप्रसारलाई तीव्रता समेत दिएका छन्।
तपाईंको ईमेल गोप्य राखिनेछ ।