विराटनगर : आगामी स्थानीय निर्वाचनमा सत्तारुढ गठबन्धन र राप्रपाबीच तालमेल हुने भएको छ। वैशाख ३० गते हुने स्थानीय तह निर्वाचनमा झापामा पाँचदलीय गठबन्धन र राजेन्द्र लिङ्देन नेतृत्वको राप्रपाबीच तालेमल हुने भएको हो।
कमल थापा नेतृत्वको राप्रपा नेपालले एमालेको चुनाव चिह्नबाट लड्ने गरी गठबन्धन गर्ने निर्णय गरेलगतै राजेन्द्र लिङ्देन नेतृत्वको राप्रपाले प्रदेश १ मा सत्ता गठबन्धनसँग तालेमलका लागि प्रस्ताव गरेको थियो।
झापामा मात्रै तालमेल गर्ने लगभग सहमति जुटेको गठबन्धनका एक नेताले बताए। तालमेल गर्दा दमकमा राप्रपालाई सघाउने र अरू पालिकामा राप्रपाले गठबन्धनका उम्मेदवारलाई सघाउने दाबी उनले गरे। राप्रपा प्रदेश १ अध्यक्ष राम थापाले आफूहरू गठबन्धनसँग आवश्यकताका आधारमा तालमेल गर्ने बताए।
राप्रपाले थापालाई मेयरको उम्मेदवार घोषणा गरिसकेको छ।
२०७४ सालको स्थानीय तह निर्वाचनमा दमकमा एमालेका रोमनाथ ओली १० हजार ८ सय ६ मतसहित निर्वाचित हुँदा राप्रपाका उम्मेदवार राम थापाले ७ हजार ६ सय ५५ मत ल्याएका थिए। योसँगै ०७४ को चुनावमा राप्रपा दोस्रो बनेको थियो।
माओवादी केन्द्रका उम्मेदवार रेवतराज पुरीले ६ हजार ८ सय ९८ मत ल्याएका थिए। माओवादी तेस्रो बनेको थियो। स्थानीय तह निर्वाचनमा झापाको गौरीगञ्ज र हल्दीबारी गाउँपालिका अध्यक्ष राप्रपाले जितेको थियो भने कचनकवल गाउँपालिकामा अध्यक्ष र उपाध्यक्ष नै जितेको थियो।
आवश्यकताको आधारमा तालमेल गर्ने
कांग्रेस प्रदेश १ सभापति उद्धव थापाले आवश्यकताका आधारमा राप्रपासँग तालमेल गर्ने सहमति भएको बताए। नेकपा एकीकृत समाजवादी पार्टीको समन्वयमा शनिबार विराटनगरमा सत्ता गठबन्धनको प्रदेश १ स्तरीय बैठक बसेको थियो।
बैठकले गठबन्धनलाई थप मजबुत बनाएर लैजाने सहमति गरेको बैठकमा सहभागी नेकपा एकीकृत समाजवादी मोरङका प्रवक्ता ओसिम आलमले बताए।
तपाईंको ईमेल गोप्य राखिनेछ ।