पोखरा : मनाङबाट निर्वाचित स्वतन्त्र सांसद राजीव गुरुङ (दीपक मनाङे) प्रवेश गरेसँगै गण्डकी प्रदेश सरकारमा नेकपाको दुईतिहाइ सिट पुगेको छ ।
मनाङ ‘ख’ बाट निर्वाचित प्रदेशका एकमात्र स्वतन्त्र सांसद प्रवेश गरेपछि गण्डकीमा नेकपाको दुईतिहाइ बहुमत पुगेको हो । हाल प्रदेशसभामा नेकपाका ३९, कांग्रेस १५, राष्ट्रिय जनमोर्चा २ (एकजनाको निधन), समाजवादी पार्टी (नयाँ शक्ति) २ र स्वतन्त्र सांसद १ जना छन् । ६० सांसद रहेको गण्डकी प्रदेश सभामा नेकपाको अब ४० सांसद भएका छन् ।
नेकपामा नवप्रवेशी सांसद मनाङेलाई प्रदेश मुख्यमन्त्री तथा नेकपा प्रदेश इन्चार्ज पृथ्वीसुब्बा गुरुङले अबिर र माला लगाएर पार्टीमा स्वागत गरेका हुन् ।
मनाङे प्रदेशको अर्थ तथा विकास समितिको सदस्य समेत हुन्। यस अघि पनि उनी प्रदेश सभामा सरकारको समर्थन गर्दै सत्ता पक्षकै लाइनमा बस्दै आएका थिए।
तपाईंको ईमेल गोप्य राखिनेछ ।