घरकै एकल महिला हराएको विषयमा नजिकका आफन्त नै मौन रहनुमा तिनकै संलग्नता रहेको हुनसक्ने भन्दै गोलबजार- १० का वडा अध्यक्ष देवनारायण महतोको उपस्थितिमा मंगलबार बिहानदेखि चोहर्वा गाउँमा छलफल भएको थियो। छलफलमा जेठाजु रामदेव यादव र भतिज लक्ष्मण यादवसहित दुवै जना मौन बसेपछि अपराह्न डेढ बजेतिर दुवै जनालाई स्थानीयले प्रहरीको जिम्मा लगाएका थिए। कारवाहीका लागि तदारुकता नदेखाएको भन्दै स्थानीय गाउँलेले पूर्व-पश्चिम राजमार्गको चोहर्वा खण्डमा करिब एक घण्टा चक्काजामसहित नाराबाजीसमेत गरे।

गत साउन २५ गते बेलुका साढे ७ बजेतिर चोहर्वा गाउँको जेठाजुको घरसँगै जोडिएको बाख्राको खोरसहित रहेको घरमा दाल बसाउँदै गरेकी कारीदेवीलाई मोटरसाइकलमा आएका दुई जना अपरिचित व्यक्तिले ‘दिदीको छोरा बिरामी छ, हेर्न जाऊँ’ भन्दै मोटरसाइकलमा चढाएर लगेपछि बेपत्ता भएको गाउँलेहरू बताउँछन्। 

ससुरा जुगेश्वर यादवको नाममा रहेको एक विगाह १६ धुर जग्गामध्ये पतिले अंशवापत् पाएको १० कठ्ठा आठ धुर जग्गा पाएकी कारीदेवीले ससुरा अनि पतिको निधनपछि ससुराको नाममा अझै तीन ठाउँमा गरी १६ कठ्ठा १६ धुर जग्गा भेटिएपछि त्यसमा अंश दाबीसहित सिरहा जिल्ला अदालतमा २०७४ भदौ ५ मा अंश मुद्दा हालेकी थिइन्। उक्त मुद्दा जेठ २४ मा फैसला हुनु अगावै भतिज लक्ष्मणले ‘मुद्दा फिर्ता नलिए जे पनि हुन सक्छ’ भन्दै पटक पटक धम्क्याएको कारीदेवीका वारेस रहेका नाति पुनीत यादवले बताए। 

जिल्ला प्रहरी कार्यालय सिरहाका प्रवक्ता प्रहरी नायव उपरीक्षक माधवराज खरेलले कारीदेवी हराएपछि भतिज लक्ष्मणले खोजतलास गरिपाऊँ भन्दै दिएको निवेदनको आधारमा प्रहरीले अनुसन्धानसहित खोजी गरिरहेको जानकारी दिए। ‘जेठाजु, भतिज र आफन्तसँग सोधपुछ गरेका छौँ’, प्रहरी नायव उपरीक्षक खरेलले भने, ‘अंशकै लागि बाबुछोरा मिलेर अपहरण गरी बेपत्ता बनाएको गाउँलेहरूको दाबी हो भने किटानी जाहेरी परेपछि छानविन र थप अनुसन्धान हुन्छ।’