यसका लागि नेताले सांसदलाई ब्रिफिङ गरेको समाचार अन्नपूर्ण पोष्ट दैनिकले छापेको छ। विधेयक प्रतिनिधिसभाबाट पनि कांग्रेसको अवरोध र होहल्लाबीच पारित भएको थियो। केसीका माग ‘हुबहु’ पूरा गर्नेगरी विधेयक आएकाले अनशन बसिरहनुको तुक नभएको सत्तापक्षको जिकिर छ।

शिक्षामन्त्री गिरिराजमणि पोखरेल, नेकपा संसदीय दलका उपनेता सुवास नेम्वाङ, प्रमुख सचेतक देव गुरुङ, राष्ट्रिसभा दल नेता दीनानाथ शर्मा, नेता योगेश भट्टराईलगायतले सत्तापक्ष र केसी पक्षका मागमा देखिएको अन्तर र सत्तापक्षले अवलम्बन गर्नुपर्ने रणनीतिबारे सांसदलाई ब्रिफिङ गरेका छन्। 

प्रमुख प्रतिपक्षी कांग्रेसले केसीको अनशन र आन्दोलनको बलमा विधेयकलाई पुनः प्रतिनिधिसभामै फर्काउन खोजिरहेको छ। सत्तापक्ष भने जसरी पनि पारित गर्न चाहन्छ। विधेयकमा केसीका मागसमेत सम्बोधन भएको भन्दै ‘दीपावली’ गर्ने उसको रणनीति छ।