उडानका लागि आवश्यक भिजिबिलिटी (आखाँले हेरेर देख्नसक्ने दूरी)  अत्यन्त न्यून भएपछि उडान रद्द गरिएको सिमरा विमानस्थलका  प्रमुख वसन्त गौतमले बताए। ‘हामीलाई हवाई उडानका लागि कम्तीमा २४ सय मिटर भिजिबिलिटी चाहिन्छ। तर, पुष १ गतेदेखि १ हजारदेखि १५  मिटरभन्दा  भिजिबिलिटी बढेको छैन्’ गौतमले भने।

सिमरा विमानस्थलवाट पुष १ गतेदेखि उडान अवरुद्ध भए पनि २ गते केही उडान भएको थियो। ‘हिजोदेखि पूरै ठप्प छ, यस्तो अवस्था अझै कति दिन रहला भन्न सकिँदैन्’ उनले भने।

काठमाडौबाट सबैभन्दा छोटो दूरीमा रहेको सिमरा विमानस्थलबाट दैनिक ५ सयजनाले सेवा लिँदै आएका छन्। सिमरा  विमानस्थल बारा, पर्सा, रौतहट, मकवानपुर, भारतको बिहार, पथलैया–वीरगञ्ज औधोगिक करिडोरका व्यापारी र  प्रदेश २ मा हुने अधिकांश राजनीतिक दलका प्रमुखको आउजाउ हुने मुख्य  केन्द्रबिन्दु हो।

‘सिमरा बिमानस्थल काठमाडौं आउनजानका लागि तराईको सबैभन्दा सहज गेटवेये हो, यहाँबाट दैनिक ५ सयजना आउजाउ गर्छन्’ विमानस्थल प्रमुख गौतमले भने ‘हाम्रो जम्मा १५ मिनेटको फ्लाईट हो, यहाँ अवरुद्ध हुनेबित्तिकै  सेवाग्राहीलाई ५/६ घण्टाको यात्रा गर्नुपर्छ।’

सिमरादेखि काठमाडौं हवाई उडानका लागि हालसम्म बुद्ध एयरले मात्रै सेवा प्रदान  गर्दै आएको छ भने श्री एयरलाइन्सले परीक्षण उडान गरिसकेको छ।  ‘उहाँहरू (श्री एयरलाइन्स)ले  हामीसँग सम्झौता गरिसक्नुभएको छ। सायद जनवरीबाट उडान शुरु गर्नुहुन्छ  होला’ उनले भने।