चीनको विदेश मन्त्रालयले काठमाडौंमा पक्राउ परेका १३० जना नागरिकहरु ठगीमा संलग्न भएको जानकारी दिएको छ। 'नेपालमा सोमबार पक्राउ परेका १३० जना नागरिक सीमापार विद्युतीय अपराधमा मुछिएका नागरिक हुन्', चिनियाँ विदेश मन्त्रालयले मंगलबार भनेको छ। 

चिनियाँ विदेश मन्त्रालयका प्रवक्ता जेङ्ग स्युहाङले मंगलबार भएको नियमित पत्रकार सम्मेलनका नेपालमा पक्राउ परेका १३० जना चिनियाँ नागरिकबारे बोल्दै यस्तो जानकारी दिएका हुन्। पक्राउ परेकाले महिलाहरुको अश्लील भिडियो बनाउनेदेखि बैंक ह्याकिङको अपराधसम्म गरेको दाबी चीनले गरेको छ।

'नेपालमा पक्राउ परेका सबै नागरिक सीमापार विद्युतीय अपराधमा मुछिएका छन्', उनले पत्रकार सम्मेलनमा भने, 'उनीहरुले विद्युतीय माध्यमबाट ठगी गरेको पाइएको छ। यसबारेमा नेपाल र चीन दुवैतर्फका प्रहरीले अनुसन्धान गरिरहेका छन्।'

चिनियाँ विदेशमन्त्रालयले नेपालको राजधानी काठमाडौंमा एकै दिन भएको यति ठूलो अपरेशनमा चिनियाँ प्रहरी र नेपाल प्रहरीले संयुक्तरुपमा गरेको जानकारी दिएका छन्। 

'पक्राउ परेकाहरु सीमापार विद्युतीय अपराधमा संलग्न भएकाहरु हुन्। जालसाजीमा मुछिएका उनीहरुले अनलाइन जुवा खेलाउनेदेखि अन्य अपराध गरेका पाइएको छ', उनले भने, 'नेपालसँगको सहकार्यलाई मजबुद बनाउने क्रममा भएको यो संयुक्त अपरेशन हो। हामीले हाम्रो मित्रतालाई अझ बलियो बनाउने क्रममा प्रहरीबीच पनि संयुक्त कारवाही चलाएका हौँ।'