स्वास्थ्य निर्देशनालय गण्डकी प्रदेशले दिएको जानकारी अनुसार कालीगण्डकी गाउँपालिकामा पुष्टी भएका संक्रमितहरुको भन्दा पनि हिरासतमा रहेका यूवामा कसरी कोरोनाको पुष्टी भयो? भन्ने बारेमा स्थलगत अध्ययन गरी तथ्यको खोजी गर्न डब्लुएचओ र गण्डकी प्रदेश स्वास्थ्य निर्देशनालयका प्रतिनिधी सहितको संयुक्त टोली गोरखा पुगेको हो। उक्त टोलीमा टोलीमा डब्लुएचओका डा. राजिव लालचन र स्वास्थ्य निर्देशनालयका नानीबाबु दानी सहित अन्य २ जना रहेका छन्।

प्रादेशिक स्वास्थ्य आपतकालीन कार्यसंचालन केन्द्र गण्डकी प्रदेशका संयोजक नबराज शर्माका अनुसार अध्ययनका लागि गएको टोलीले मुख्य गरी हिरासत रहेका व्यक्तिको कन्ट्राक्ट ट्रेसिङ लगायतका कुराहरुको अध्ययन गर्ने छ।

‘हिरासतमा रहेका व्यक्तिमा कोरोनाको संक्रमण कसरी पुग्यो? भन्ने बिषयले ध्यान तानेको छ। हिरासतमा नै कोरोना पुग्यो भने अन्य व्यक्तिहरु कति सुरक्षित होलान?’ उनले भने, ‘यही कुराको सत्यतथ्य पत्ता लगाउनको लागि टोली गोरखा गएको हो। टोलीले ती यूवा हिरासतमा रहेका बेला उनको सम्पर्कमा आएकाहरु, उनको मुद्धाको सुनुवाई र प्रमाण तथा बयानका लागि लगिएका अस्पताल, अदालत लगायतका स्थानमा प्रहरीले लिएर जाँदाको अवस्था र त्यो बेला भएको लसपस तथा हिरासतमा रहँदा गरेका सबै गतिबिधिहरुको बारेमा अध्ययन गर्ने छ।

गोरखामा आईतबार संक्रमणको पुष्टी भएकामध्ये ८ जना भारत र एक जना काभ्रेबाट आएपछि क्वारेन्टाइनमा बसेकाहरु हुन्। हिरासतमा रहेका यूवक भने पालुङटार नगरपालिकाका हुन्। जबरजस्ती करणीको आरोपमा १० दिनअघि ती युवालाई प्रहरीले पक्राउ गरी हिरासतमा राखेको थियो। ती युवाको आरडीटीमा भने नेगेटीभ रिपोर्ट आएको थियो।