काभ्रेपलााञ्चोक : महाभारत पर्वत शृंखला (डाँडापारि) पारि अवस्थित महाभारत गाउँपालिका–७ बनखुको २१ वर्षीया गर्भवती कविता मोक्तानलाई सोमबार हेलिकोप्टरबाट काठमाडौं लगियो।
‘व्यथा’ लागेपछि शनिबार स्थानीय ‘बर्थिङ सेन्टर’मा भर्ना भएकी उनलाई उच्च रक्तचापका कारण त्यहाँ सुत्केरी गराउन समस्या भएपछि काठमाडौं लगिएको हो।
मोक्तानलाई राष्ट्रपति महिला उत्थान कार्यक्रममार्फत निःशुल्क हेलिकप्टरबाटथापाथलीस्थित प्रसूतिगृहमा लगिएको हो। जिल्लाको डाँडापारिस्थित महाभारत र खानीखोला गाउँपालिकामा स्थानीय स्वास्थ्य संस्थामा उपचार सम्भव नभएपछि विशेषगरी सुत्केरी व्यथा लागेकाको स्वास्थ्य जोखिममा हेलिकोप्टरको व्यवस्थापन गरी सदरमुकाम तथा काठमाडौंका अस्पताल लैजाने गर्दै आइएको छ।
सदरमुकामबाट टाढा अवस्थित तथा कच्ची सडकका कारण तत्काल उपचार गर्नुपर्ने स्वास्थ्य समस्यामा हेलिकोप्टरकै सहारा लिनुपर्ने बाध्यता छ। कार्यक्रम लागू भएपछि हालसम्म महाभारतको मात्रै आठ सुत्केरी व्यथा लागेकाको हेलिकोप्टरबाट उद्धार गरिएको गाउँपालिका अध्यक्ष कान्छालाल जिम्बाले बताए। ‘लामो कच्ची सडकमा सुत्केरी व्यथा लागेका महिलाको स्वास्थ्य जोखिममा पर्ने भएकाले डाँडापारिका नागरिकले हेलिकोप्टरकै भर पर्नुपर्ने हुन्छ, यहाँका सडक स्तरोन्नति गर्दैछौँ अब अन्य बिरामीलाई पनि केही सहज होला’, उनले भने।
अध्यक्ष जिम्बाले निःशुल्क हवाइ उद्धार निर्देशिका–२०७७ अनुसार सुत्केरी व्यथा लागेकाको लागि सेवा प्रदान गर्दै आएको बताए। महाभारतका नागरिकलाई उपचार गर्न सदरमुकामका अस्पताल आउनुपर्दा वर्षायाममा झन् कठिन हुने गरेको बताइन्छ।
यसअघि गत साउन अन्तिम हप्ता डाँडापारिस्थित खानीखोला गाउँपालिका–४ डाँडागाउँका ७० वर्षीया सुन्तामाया जिम्बालाई उपचारका लागि हेलिकोप्टरमार्फत धुलिखेल अस्पताल ल्याइएको थियो। टाउको दुख्ने र हात झम्झमाउने रोगबाट पीडित उनलाई पनि गाउँको कच्ची सडकबाट एम्बुलेन्समा ल्याउन सम्भव नहुँदा हेलिकोप्टर चार्टर गर्नुपर्ने बाध्यता बनेको थियो। त्यति वेला उहाँका आफन्तले ७० हजार भाडा तिरेर धुलिखेल ल्याउनुपरेको थियो। ‘गम्भीर प्रकृतिको बिरामी पर्दा वर्षायाममा हेलिकप्टरको विकल्प छैन’, गाउँपालिका अध्यक्ष इन्द्रबहादुर थिङले भने।
गत साल नै तीन दिनदेखि झाडापखालाले ग्रस्त खानीखोला गाउँपालिका–६ की १७ वर्षीया रञ्जिता थोकरलाई उपचारार्थ अस्पताल लैजान हेलिकोप्टर गाउँ पुर्याइयो। तर हेलिकोप्टर रित्तै फर्किनुपर्यो। विडम्बना हेलिकोप्टर गाउँ पुग्दै गर्दा उहाँको स्थानीय स्वास्थ्य संस्थामा उपचारका क्रममै मृत्यु भइसकेको थियो।
डाँडापारिस्थित टाढाको विकट क्षेत्रमा महँगो भए पनि सडक अवरुद्ध हुँदा हेलिकोप्टर निकै सजिलो साधन मानिन्छ। वर्षायाममा ग्रामीण भेगमा भएका सडक भत्किने र पहिराले अबरुद्ध हुँदा जिल्लाको दक्षिणी क्षेत्र महाभारत डाँडापारिका दुई गाउँपालिकाका नागरिकले बिरामी पर्दा हेलिकोप्टरको भर पर्नुपर्छ। गर्भवतीबाहेक अन्य बिरामीले हेलिकोप्टरको भाडा तिर्न नसक्ने भएकाले उपचारबाट वञ्चित हुनुपर्ने बाध्यता पनि देखिएको छ।
राष्ट्रपति महिला उत्थान कार्यक्रम सुत्केरीको व्यथाले स्वास्थ्य जोखिममा पर्ने महिलाका लागि वरदान सावित भएको छ। तर भौगोलिक विकटता तथा वर्षा मौसममा कच्ची सडक अवरुद्ध हुँदा काभ्रेपलाञ्चोकको डाँडापारि क्षेत्रका दुई गाउँपालिका खानीखोला र महाभारतमा बिरामीको उद्धारमा निकै कठिनाइ हुने गरेको स्थानीय बताउँछन्।
हेलिकोप्टरबाट बिरामी/गर्भवतीको उपचारार्थ उद्धार गरिए पनि जिल्ला सदरमुकामका अस्पताल लैजान हेलिकोप्टर अवतरण गर्न अर्को व्यवस्थापन गर्नुपर्ने हुँदा काठमाडौंका अस्पताल नै लैजानुपर्ने बाध्यता छ।
तपाईंको ईमेल गोप्य राखिनेछ ।