काठमाडौं : फिफा महिला विश्वकपको फाइनल खेल आज हुँदैछ। नवौँ संस्करणको विश्वकपमा आइपुग्दा अमेरिका भने यो विश्वकपमा अन्तिम १६ बाटै बिदा भएको छ।
हरेक विश्वकपमा सेमिफाइनलसम्म पुगेको अमेरिकाका लागि यो विश्वकप फुटबल पीडादायी बन्यो। अमेरिकी टोली बाहिरिए पनि यो विश्वकपको फाइनलमा भने अमेरिकी तीन महिला मैदानमा हुनेछन्।
तीनमध्ये महत्त्वपूर्ण भूमिकामा रहने छिन् ३६ वर्षीया टोरी पेन्सो। उनी स्टेडियम अष्ट्रेलियामामा महिला विश्वकप फाइनलमा रेफ्री हुने संयुक्त राज्यबाट पहिलो अधिकारी बन्ने छिन्।
महिला विश्वकपमा अमेरिकाको सफलताले त्यहाँका रेफ्रीलाई फाइनल खेलाउन रोकेको थियो। यो पटक भने अमेरिकी महिला फुटबल टोलीको असफलताले तीन सन्तानकी आमाको लागि विश्वकप फाइनल खेलाउन ढोका खोलिदिएको हो।
उनले यो विश्वकपमा सेमिफाइनलको खेल पनि सफलतापूर्वक खेलाइसकेकी छन्। सेमिफाइनलमा इंग्ल्याण्ड र अष्ट्रेलियाबीचको खेलमा पनि उनी नै मुख्य रेफ्रीको भूमिकामा थिइन्। तीन सन्तानकी आमा पेन्सो आज हुने फाइनलमा मुख्य रेफ्री हुनेछिन्। उनका तीन छोरी ८ वर्षीया, ६ वर्षीया र ५ वर्षीया रहेका छन्। उनका श्रीमान् पनि व्यावसायिक रेफ्री नै हुन्।
उनलाई साथ दिन अन्य दुई अमेरिकी र एक जापानी महिला हुनेछन्। यसैले उनी सन् १९३४ पछि एउटै प्रतियोगितामा सेमिफाइनल र फाइनल खेलमा रेफ्री गर्ने पहिलो आधिकारिक खेलाडी पनि बनिन्। ८९ वर्षअघि दोस्रो पुरुष विश्वकपमा स्विडेनी रेफ्री इभान एक्लिन्डले सेमिफाइनल र फाइनलमा रेफ्रीको रूपमा काम गरेका थिए।
फाइनलमा नियुक्त भएपछि उनले भनिन् ‘यो मेरो लागि साँच्चिकै विशेष क्षण थियो जब कोलिनाले जर्सी समातेका थिए। मलाई लाग्छ हामी सबैले अवसर र मौकाको फाइदा उठाउनु पर्छ।
‘मलाई थाहा छैन मैले कस्तो प्रतिक्रिया दिएँ, इमानदारीपूर्वक भन्नुपर्दा खुशीको आँसु पक्कै तर म भावनाले भरिएको थिएँ। म अहिले बाँचिरहेको यो क्षणभन्दा राम्रो अरू केही छैन’, उनले भावुक हुँदै भनिन्।
२०२० मा, पेन्सो पुरुष मेजर लिग सकर (MLS) खेलमा रेफ्री गर्ने पहिलो महिला अधिकारी बनिन्। आफ्नो यात्राको बारेमा बोल्दै उनले खुलाइन्, ‘मैले बच्चाको रूपमा सुरु गरें, म १४ वर्षको थिएँ। यो मेरो लागि जागिर पाउने समय थियो र मैले फुटबल खेलेको मैदानमा आधिकारिक बन्न मेरो आमाको सुझाव थियो। केही नगदको लागि मैले सुरु गर्दा यो एकदम राम्रो अनुभव थियो।’
फाइनलको लागि पेन्सोको टोलीमा टचलाइनहरू चलाउने सहायकहरू, ब्रुक मेयो र क्याथ्रिन नेस्बिट समावेश छन्। नेस्बिटले गत वर्ष कतारमा भएको पुरुष विश्वकपमा पनि काम गरेकी थिइन्।
यो विश्वकपमा पेन्सोको प्रतियोगिताको पाँचौ खेल हुनेछ। पेन्सोले समूह चरणमा जर्मनी मोरक्कोको खेल खेलाएकी थिइन्। जहाँ जर्मनी ६-० ले विजयी भएको थियो। त्यस्तै न्युजिल्याण्डसँग स्विट्जरल्याण्डले गोलरहित बराबरी खेलेका थिए भने प्रिक्वार्टरफाइनलमा फ्रान्सले मोरक्कोलाई ४-० ले पराजित गरेको थियो।
पेन्सोले खेलाएको सेमिफाइनलको अन्तिम खेलमा इंग्ल्याण्डले अष्ट्रेलियालाई ३-१ ले हराएको थियो। चार खेलमा उनले चार पहेँलो कार्ड दिएकी छन्।
तपाईंको ईमेल गोप्य राखिनेछ ।