प्रदेश
जिल्लाः
निर्वाचन क्षेत्र
पार्टी

समाज

मनमोहन कलेज किन्ने देउवाको प्रस्ताव सांसद पाण्डेले गरे अस्वीकार
SHARES

साउन २९, २०७४

    काठमाडौं : सम्बन्धनको पर्खाइमा रहेको काठमाडौंको मनमोहन मेडिकल कलेजका सञ्चालकले आफ्ना सबै भौतिक संरचना किन्ने सरकारको प्रस्ताव अस्वीकार गरेका छन्।

    मेडिकल कलेज सञ्चालनको लागि आशयपत्र लिएर बसेको उक्त मेडिकल कलेजका सञ्चालक राजेन्द्र पाण्डेलाई प्रधानमन्त्री शेरबहादुर देउवाले टेलिफोन गरी कलेज सरकारले किन्ने प्रस्ताव गर्दा उनले अस्वीकार गरेका हुन्।

    चिकित्सा शिक्षा सुधारको माग राख्दै अनशनरत डा. गोविन्द केसीले केदारभक्त माथेका संयोजकत्वको चिकित्सा शिक्षासम्बन्धी राष्ट्रिय नीति तर्जुमा उच्चस्तरीय कार्यदलको सुझाव अनुसार चिकित्सा शिक्षा ऐन परिमार्जन गरेर संसदबाट पारित गर्नुपर्ने मुख्य माग राखेका छन्। उक्त कार्यदलले काठमाडौं उपत्यकामा १० वर्षसम्म नयाँ मेडिकल कलेज सञ्चालन गर्न नपाइने सुझाव दिएको छ। त्यसैले प्रधानमन्त्रीले काठमाडौंमा मेडिकल कलेज सञ्चालनको तयारीमा रहेको मनमोहन मेडिकल कलेजका सञ्चालक सांसद पाण्डेसँग कलेजका सबै संरचना किनिदिने प्रस्ताव गरेका हुन्।

    आइतबार प्रधानमन्त्री निवास बालुवाटारमा सत्तारुढ नेपाली कांग्रेस र नेकपा माओवादी केन्द्रका नेता सम्मिलित छलफलकै क्रममा प्रधानमन्त्री देउवाले सांसद पाण्डेलाई फोन गरेर कलेजका संरचना किन्ने प्रस्ताव गरेका माओवादी नेता नारायणकाजी श्रेष्ठले जानकारी दिए।  

    '१० वर्ष काठमाडौंमा मेडिकल कलेज खोल्न नदिने प्रावधानले अप्ठेरो भयो। प्रधानमन्त्रीले प्रतिपक्षी दलका नेता र मेडिकल कलेजका सरोकारवाला पक्षसँग कुरा गर्नुभयो' श्रेष्ठले भने 'प्रधानमन्त्रीले तपाईहरु अस्पतालमात्रै चलाउनु वा मेडिकल कलेजका सबै संरचना सरकारले किनिदिन्छ भन्ने प्रस्ताव गर्दा (कलेजका सञ्चालक) राजेन्द्र पाण्डेजीले हामी आफै मेडिकल कलेज चलाउँछौं, बेच्ने पक्षमा छैनौं भन्नुभयो त्यसपछि कुरा अप्ठेरोमा पुग्यो।'

    यस विषयमा जानकारी लिन सांसद पाण्डेको सम्पर्क गर्दा उनको मोवाइल फोन उठेन। कलेजका अर्का सञ्चालक सांसद वंशीधर मिश्रले सरकारले औपचारिक रुपमा आफूहरुलाई प्रस्ताव राखेको जानकारी नभएको बताए।  

    उनले चिकित्सा विज्ञान राष्ट्रिय प्रतिष्ठान (न्याम्स) को नाम मनमोहन राख्ने र त्यसैले सबै संरचना किन्ने विषयमा आफूहरु सहमत भए पनि सरकारले किन्ने निर्णय गर्न नसकेको बताए। अहिले पनि कलेज किन्छु भनेर आफूहरुलाई झुलाउन खोजिएको उनको भनाइ छ।

    'पहिले न्याम्सले किन्ने र नाम परिवर्तन गरेर मनमोहन अधिकारी राष्ट्रिय प्रतिष्ठान राख्ने सहमति भए पनि सरकारले सैद्धान्तिक निर्णय गर्न सकेन बिल (ऐन) पनि ल्याउन सकेन' उनले भने 'अहिले फेरि सम्भव नहुने कुरा गरेर आफूहरुलाई झुलाउन खोजिएको छ।'

सम्बन्धित समाचार

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
मुक्तिश्री टावर
नयाँ बानेश्वर, काठमाडौं, नेपाल

इमेलः
समाचार विभाग: news@thahakhabar.com
बिज्ञापनः ad@thahakhabar.com
फोन : ९७७-१- ४७८६५६२

थाहा मिडिया ग्रुप

थाहा गणितको शुत्र होइन । कुनै मन्त्र पनि होइन । थाहा त चेतनाको त्यो झिल्को हो जसले हाम्रो दृष्टिलाई फराकिलो बनाउंँछ, हाम्रो विचारलाई उघारो बनाउँछ, हाम्रो कामलाई ठिक बनाउँछ र हाम्रो जीवनलाई थप सहज बनाउँछ । थाहा एउटा प्रकृया हो ... [विस्तृत]