मनोरञ्जन

सिओल ओलम्पिक हलमा नेपथ्यको भव्य कन्सर्ट
SHARES

असोज १९, २०७४

    नेपालको चर्चित गायन समूह नेपथ्यले सिओल ओलम्पिक पार्कस्थित ओलम्पिक हलमा बुधबार भव्य कन्सर्ट दिएको छ।

    ‘ओलपार्क’का रुपमा बहुचर्चित यस ओलम्पिक हल सन् १९८८ मा दक्षिण कोरियाले ओलम्पिक आयोजना गर्दा तयार पारेको ओलम्पिकपार्कभित्रै समेटिएको छ।  सन् २०११ मा त्यसै हललाई कोरियाली सरकारले कन्सर्ट आयोजना गर्ने थलोका रुपमा विकास गर्दै पुनःनिर्माणगरेको थियो।

    त्यसयता अन्तर्राष्ट्रिय स्तरमै बहुचर्चित सांगीतिक नामहरु ‘डिप पर्पल’,  ‘जुडास प्रिस्ट’,मारिया क्यारे’ र ‘एयर सप्लाइ’ले समेत यस हलमा कन्सर्ट दिइसकेका छन्। कोरियाको राष्ट्रिय पर्व ‘चुसोक फेस्टिभल’कै बखत पारेर त्यहाँस्थित कास्की परिवारले नेपथ्य कन्सर्टको आयोजना गरेको थियो।

    चुसोक कृषिमा आधारित परम्परागत पर्व हो । खेती किसानीको सिजनलाई ध्यानमा राखेर मनाइने यो पर्वका बेला कोरियाली समाजका मानिसअघिल्ला पुस्ता र मान्यजनहरुसँग भेटघाट गर्छन् । धेरैजसो कोरियालीहरु यसै समय पारेर आफ्नो पुख्र्यौली थातथलो पनि पुगिरहेका हुन्छन् ।

    तर, त्यसै मुलुकमा कमाउन पुगेका आप्रवासीहरुको निम्ति भने यो पर्व साथीभाइसँग भेटघाट गर्ने र स्वदेसका सम्झनाहरु ताजा पार्ने अवसर बन्न पुग्छ । यतिबेला दक्षिण कोरियामा चालिस हजारभन्दा बढी नेपाली कामदारहरु रोजगारीका निम्ति पुगेका छन् । इपिएसप्रणाली लागू भएयता यसरी नेपाली तन्नेरीहरु त्यस मुलुकमा जानथालेका हुन् ।

    ‘स्वदेसमै तपाइहरुलाई रोजगारीको प्रवन्ध गर्न नसकेकै कारण सबैजना यो ठाउँ आइपुग्नुभएको हो । आफन्त, साथीभाइ रमान्यजनहरुबाट यसरी टाढिएर बाँच्नुपर्दाको पीडा म बुझ्दछु,’ कन्सर्टकै क्रममा नेपथ्यका मुख्य गायक एवं अगुवा अमृत गुरुङले भने, ‘जेजस्तो भए पनि यहाँ रहँदाको क्षणलाई अवसरका रुपमा लिइदिनुस् र सकेसम्म आफुमा स्वदेसका निम्ति कामलाग्ने सीप विकास गर्नुस्। हाम्रा नेताहरुमा यी तमाम तन्नेरीहरुले राष्ट्रनिर्माणमा सघाउन सक्ने वातावरण तयार पार्ने दृष्टिकोणका लागि हामी अनुरोध गर्छौं।’

    यति भनिसकेपछि अमृतले केहि वर्षअघि मात्र तयार पारेको एउटा मार्मिक गीत प्रस्तुत गरे जसको भाव आफ्नो प्रिय मानिस छाडेरहिँडेका आप्रवासी कामदार नेपालीको पीडामाथि उभिएको थियो–

    ‘मै मरि जाउँला, जीवन छोटो छ

    लेखेको सम्झना, चेतेर नफाल

    सिरानमा फोटो छ...’

    यस गीतलाई नेपथ्यले आफ्नो २५ औं वर्ष मनाउने क्रममा हालै म्यूजिक भिडियोका रुपमा पनि सार्वजनिक गरेको छ। मजदुरीका निम्तिविदेशीएका नेपालीहरुको भोगाइ प्रस्तुत गर्ने यो म्यूजिक भिडियो नेपथ्यको यु ट्युब च्यानलमा उपलब्ध छ। 

    नेपथ्यका केहि सदाबहार गीतहरु प्रस्तुत गरिसकेपछि अमृत फेरि दर्शकहरुसँग कुरा गर्न तम्तयार भए।

    ‘यस ओलम्पिक पार्कमा उभिएर गीत गाइरहँदा मलाई यतिबेला विधान लामाको याद आइरहेको छ जसले १९८८ को ओलम्पिकमा मुलुकका निम्ति पदक हासिल गरेका थिए,’ उनले थपे, ‘दुर्भाग्य, त्यस्ता प्रतिभाशाली खेलाडीलाई पनि हाम्रो मुलुकले रोकेर राख्न सकेन रअहिले उनी पनि विदेशिएका छन्। यस्ता धेरै प्रतिभाशाली विधानहरुलाई यतिबेला नेपालले गुमाइरहेको छ। म हाम्रा नेताहरुलाई मुलुकभित्रै राम्रो अवसरको सिर्जना गरेर यस्ता प्रतिभाहरुलाई स्वदेशमै आकर्षित गर्न आव्हान गर्छु।’

    यो समेत गरेर दक्षिण कोरियाली राजधानी सिओलमा नेपथ्यको यो पाँचौ प्रस्तुती थियो। 

    त्यसपछिको चरणमा ‘यो जिन्दगानी’ बाट अघि बढेको कन्सर्ट ‘कोशीको पानी’, ‘गाउँ गाउँबाट उठ’ हुँदै नेपथ्यका सुपरहिट गीतहरु ‘रेशम’र ‘तालको पानी’मा प्रवेश गरेको थियो।

    ‘रातो र चन्द्रसुर्य’ बाट अन्त्य गर्नुअघि अमृतले फेरि मधुरो स्वरमा भलाकुसारी गर्न चाहे।

    ‘नेतृत्वका कमी कमजोरीले गर्दा हामीले धेरै दुःख पाइसकेका छौं,’ राज्य र संसदको चुनाव आउन लागेको परिवेशमा उनले भने, ‘अब चाँही कम्तीमा तमाम नेपाली मतदाताहरुले झुठा वचन दिनेलाइ भन्दा एकपटक राम्ररी सोचेर सहि नेतृत्वको चयन गरुन्।’

    कन्सर्टमा सँधैझैँ अमृतलाई स्टेजका साथीहरु ध्रुवलामाले ड्रम सेटमा, सुरज थापाले किबोर्डमा, सुविन शाक्यले बेस गितारमा, निरज गुरुङले गितारमा र शान्ति रायमाझीले मादलमा सघाएका थिए।

    ‘नेपथ्यको २५ वर्षे सांगीतिक यात्रा मनाइरहेकै बेला सउलमा यसरी पाँचौ प्रस्तुतीका निम्ति आउन पाउँदा असाध्यै हर्ष लागिरहेको छ,’ दुइघन्टासम्म लगातार दर्शकहरुसँग एकाकार भइसकेपछि कार्यक्रम सकिने बेलामा अमृतले भने, ‘नेपाल भित्र र नेपाल बाहिर बसेरनेपथ्यलाई सुनिदिनुहुने र हाम्रा भाकामा रमाइ दिनुहुने सबैलाई मुरीमुरी धन्यवाद दिन चाहन्छु।’

    कार्यक्रम सफलताका साथ सम्पन्न भएकामा कास्की परिवारका तर्फबाट खोम गुरुङले कोरियामा बसोबास गर्ने सम्पूर्ण नेपालीलाई धन्यवाद व्यक्त गरे। त्यसैगरी यस कन्सर्टलाई सफल बनाउनका निम्ति सहयोग पुर्‍‍याउनेहरु प्रति पनि उनले आभार प्रकट गरे।

सम्बन्धित समाचार

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
मुक्तिश्री टावर
नयाँ बानेश्वर, काठमाडौं, नेपाल

इमेलः
समाचार विभाग: news@thahakhabar.com
फोन : ९७७-१- ४७८६५६२
बिज्ञापनः ad@thahakhabar.com
फोन : ९७७-१-४७८६१९८ ९८४१३०४३९१ (प्रेम) / ९८१८३४३६६९ (विनय)

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]