जनकपुर : राष्ट्रिय जनता पार्टी (राजपा) नेपालका नेता एवं धनुषा क्षेत्र नम्बर ३ का प्रतिनिधिसभा सदस्य उम्मेदवार राजेन्द्र महतोले आफूले जिते जनकपुरको स्वास्थ्य क्षेत्रमा ठूलो सुधार गर्ने बताएका छन्।
आइतबार धनुषाका स्वास्थ्यकर्मीहरूको भेलालाई सम्बोधन गर्दै नेता महतोले जनकपुरका अस्पतालहरूको दुर्गती र स्वास्थ्य क्षेत्रको अवस्था निकै दयनीय अवस्थामा रहेकोले त्यसको सुधारमा आफू जुट्ने बताए। नेता महतोले प्रतिनिधिसभा निर्वाचनमा आफ्ना प्रतिस्पर्धी कांंग्रेसका विमलेन्द्र निधिमाथि कटाक्ष गर्दै भने,‘जनकपुरको स्वास्थ्य अवस्थालाई यसरी सुधार गरिनेछ कि कुनै पनि भिआइपीलाई निमोनिया जस्तो साधारण रोगको उपचार गर्न काठमाडांै जाने बाध्यता रहनेछैन।’
पटकपटक सरकारमा बस्दा अस्पताल सुधारका लागि कुनै काम नगरेको भन्दै महतोले थपे, त्यतिवेला अस्पताल राम्रो बनाएको भए अहिले उपचार गर्न काठमाडौं पुग्नुपर्ने थिएन ।
चुनाव प्रचारका क्रममा निमोनिया भएपछि निधि काठमाडौं आएर ओम अस्पतालमा भर्ना भएर उपचार गरिरहेका छन्। पूर्वस्वास्थ्यमन्त्री समेत रहेका महतोले आफ्नो कार्यकालमा ५ सय बेडको अस्पताल र ५० करोडको उपकरणको लागि स्वीकृति गराए पनि त्यसको सही उपयोग अहिलेसम्म नभएको गुनासोसमेत गरे। महतोले जनकपुरको अस्पतालको स्तरोन्नति गरी आधुनिक सुविधायुक्त हस्पिटल बनाउने आफ्नो संकल्प रहेको बताए।
तपाईंको ईमेल गोप्य राखिनेछ ।