बनेपा : ठेक्काको काम जिम्मा लिएर समयमा नै काम सम्पन्न नगर्ने एकजना ठेकेदारलाई जिल्ला प्रहरी कार्यालय, काभ्रेपलाञ्चोकले बुधबार पक्राउ गरेको छ।
जिल्ला वन कार्यालय, काभ्रेपलाञ्चोक मातहत रहेको इलाका वन कार्यालय, चौबासको भवन निर्माण कार्य जिम्मा लिएर बीचमा नै अलपत्र पारेका अग्रिम निर्माण सेवाका प्रोपाइटर नवीन चौलागाईँबाट काम लिएका लालप्रसाद चौलागाईँलाई प्रहरीले पक्राउ गरेको हो।
चौलागाईँले २०७३ वैशाख २० गते योजना सम्झौता गरेका थिए। २०७४ वैशाख १९ सम्पन्न गर्ने गरी सम्झौता गरेको उक्त काम ६० प्रतिशत मात्रै सम्पन्न गराई काम अगाडि नबढाएका कारण आवश्यक सोधपुछका लागि बुधबार कात्तिके देउरालीबाट पक्राउ गरिएको जिल्ला प्रहरी कार्यालयका प्रहरी नायब उपरीक्षक महेन्द्रप्रसाद मरासिनीले बताए।
'चौलागाईँलाई कस्तो खालको कारबाही हुने भन्ने विषयमा आज टुंगो लगाइनेछ', मरासिनीले भने। चौलागाईँ अग्रिम निर्माण सेवाका प्रोपाइटर नवीन चौलागाईँबाट ठेक्का लिएका पेटी ठेकेदार भएको प्रहरीले जनाएको छ।
जिल्ला प्रशासन कार्यालय, काभ्रेपलाञ्चोकले जिल्लामा ठेक्का सम्झौता गरी समयमा नै काम नगर्ने निर्माण कम्पनीका ठेकेदारको विवरण तयार गरी कारबाहीको प्रक्रिया अगाडि बढाइरहेको प्रमुख जिल्ला अधिकारी कृष्णबहादुर राउतले जानकारी दिए।
तपाईंको ईमेल गोप्य राखिनेछ ।