समाज

लोकसेवाको विज्ञापन रद्द गर्ने संसदीय निर्देशन प्रशासनिक ‘कू’
SHARES

जेठ २९, २०७६

    काठमाडौं : लोकसेवा आयोगका पूर्व कार्यवाहक अध्यक्ष टीकादत्त निरौलाले लोकसेवा आयोगको विज्ञापन रद्द गर्न संसदीय समितिले दिएको निर्देशनलाई प्रशासनिक ‘कू’ को संज्ञा दिएका छन्। 

    बुधबार रिपोर्टर्स क्लब नेपालमा बोल्दै उनले भने, ‘२०१७ सालमा राजा महेन्द्रले राजनीतिक कू गरेका थिए। अहिले समितिले त्यस्तै प्रशासनिक कू गरेजस्तो लाग्यो।’

    आयोगको मुख्य काम नै विज्ञापन गर्नु भएको सुनाउँदै उनले यसलाई नै रोक्नु भनेको आयोगलाई भंग गरेसरह समितिको निर्णय भएको उनको आरोप छ।  

    समितिले रिक्त पदमा करारद्वारा पूर्ति गर्न भनेर दिएको निर्देशनप्रति टिप्पणी गर्दै यो पनि गलत भएको उनको तर्क छ। ‘यो पनि गलत हो। पहिला राजा महेन्द्रको पालामा करारमा आफ्ना आसेपासे नियुक्ति गरिन्थ्यो अनि पछि तिनीहरुलाई नै स्थायी गरियो’, उनले भने, ‘अहिले पनि त्यस्तै भइरहेको छ। महिला विकास अधिकृतहरु स्थायी भए।’

    संसदीय समितिले गरेको निर्णय प्रशासनमा अराजकता ल्याउने निर्णय भएको उनको गम्भीर आरोप छ। ‘ओएनएमले सर्वे गरेर नै विज्ञापन गरिएको हो। विज्ञापन विधिसम्वत् छ। यसमा संविधानको उल्लंघन भएको छैन’, उनले भने।

    उनले अहिलेको समस्यालाई समाधान गर्न एउटै शब्द हटाउँदा राम्रो हुने पनि सुझाए। उनका अनुसार प्रत्येक स्थानीय तहमा भन्ने शब्द हटाउँदा समस्याको हल हुन्छ। 

    उनले आयोगले विज्ञापन रद्द गर्न नपर्नेपनि जिकिर गरे। उनले भने,‘९ हजार १ सय १६१ कर्मचारी भर्ना गर्न कुनै अवरोध छैन। संसदीय समिति, लोकसेवा आयोग र मन्त्रालय बसेर अघि मैले भनेजस्तो प्रत्येक स्थानीय तह भन्ने शब्द हटाउँदा समस्या हल हुन्छ।’

    निरौलाले राज्य व्यवस्था समितिले जे भन्छ त्यही मान्नुपर्छ भन्ने नभएको पनि स्पष्ट पारे। उनले भने,‘संविधानसम्वत ढंगले आएका निर्णय तथा निर्देशनहरु पालना गर्नुपर्छ। समितिले जस्तो निर्णय गर्छ त्यही आत्मासात गर्नुपर्छ भन्ने पनि सम्भव छैन।’

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४/९८४१३०४३९१ (प्रेम)
९८५१०७६३३६(सञ्जय नेपाल)
इमेल: mkt.thahakhabar@gmail.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]