भीमार्जुन आचार्यको टिप्पणी : राजनीति धेरै नै फोहोर भइसक्यो

काठमाडौं :  सरकारले कोरोनाको संकटको समयमा राजनीतिक दल विभाजनसम्बन्धी प्रावधान संशोधन गरेकोमा संविधानविदहरुले कडा आपत्ति जनाएका छन्।

यसअघि व्यवस्था गरिएको संसदीय दल र पार्टी केन्द्रीय कमिटीको ४० प्रतिशत मतले दल विभाजन गर्ने प्रावधानलाई ती दुईमध्ये एकमा भए पुग्‍ने नयाँ व्यवस्था गरिएपछि संविधानविदले पनि राजनीतिक अस्थिरता आउने चिन्ता गरेका छन्।

संविधानविद डा. भीमार्जुन आचार्यले राष्ट्रिय संकटको समयमा राजनीतिक विवाद निम्त्याउनु उचित नहुने बताएका छन्। 'राष्ट्रिय संकटको समयमा राजनीतिक विवाद  निम्त्याउने काम गर्नु उचित होइन', उनले भनेका छन्, 'संवैधानिक परिषद्को बैठक सम्बन्धमा जारी गरिएको अध्यादेश संविधान प्रतिकूल छ।'

उनले कोरोनाको संकटमा देशलाई लकडाउनमा राखेर आफूचाहिँ राजनीतिक खिचातानीमा लागेको भन्दै सरकार र नेताहरुमाथि आक्रोश व्यक्त गरेका छन्। 'राष्ट्रपतिलाई संविधानको संरक्षक मानिएको छ', उनले भनेका छन्, 'अरूलाई घरमा थुनेर आफूचाहिँ राजनीतिक खिचातानीमा लाग्‍नु निकृष्टता हो। राजनीति धेरै नै फोहोर भयो।'

राष्ट्रिय संकटको समयमा राजनीतिक विवाद निम्त्याउने काम गर्नु उचित होइन।संवैधानिक परिषद्को बैठक सम्वन्धमा जारी गरिएको अध्यादेश संविधान प्रतिकूल छ।राष्ट्रपतिलाई संविधानको संरक्षक मानिएको छ।अरूलाई घरमा थुनेर आफूचाहिँ राजनीतिक खिचातानीमा लाग्नु निकृष्टता हो।राजनीति धेरै नै फोहोर भयो।

— Bhimarjun Acharya (@BhimarjunPhD) April 20, 2020