काभ्रे : वीपी राजमार्ग अन्तर्गत रोशी गाउँपालिका वडा नंं ११ भीमखोरीको पिप्लेमा सडक दुर्घटना हुँदा २ जनाको मृत्यु भएको छ। बुधबार बिहान झन्डै ९ बजे भएको दुर्घटनामा ६ जना घाइते भएको जिल्ला प्रहरी कार्यालयका प्रहरी नायब उपरीक्षक नविनराज राईले बताए।
राईका अनुसार मृत्यु हुनेमा मोटरसाइकल चालक ओखलढुङ्गा जिल्लाका २२ वर्षीय मिन बहादुर पौडेल र मोटर साइल पछाडी सवार सोही ठाउँका २५ वर्षीय मदन बुढाथोकी छन्। पौडेलको घटनास्थलमा नै र घाइते बुढाथोकीको उपचारको क्रममा धुलिखेल अस्पतालमा मृत्यु भएको राईले बताए।
दुर्घटनापछि बस चालक सिन्धुली पकुरठाकुर–८ निवासी ३२ वर्षका टोप बहादुर तामाङलाई प्रहरीले नियन्त्रणमा लिएको छ। बनेपाबाट सिन्धुलीतर्फ गैरहेको बा ४५ प ६७५३ नम्बरको मोटरसाइकलले सोही दिशातर्फ गइरहेको सुमोलाई ओभरटेक गर्न खोज्दा दिक्तेलबाट काठमाडौंतर्फ आइरहेको बा ४ ख ६०३ नम्बरको यात्रुबाहक बससँग ठोक्किएर दुर्घटना निम्तिएको इलाका प्रहरी कार्यालय मंगलटारका प्रहरी निरीक्षक शंकर श्रेष्ठले बताए।
उक्त घटनामा परी घाइते भएका ६ जनाको काभ्रेपलाञ्चोक जिल्लाको धुलिखेल सामुदायिक अस्पतालमा उपचार भैरहेको छ। घाइतेको अवस्था सामान्य रहेको प्रहरी नायब उपरीक्षक राईले जानकारी दिए।
तपाईंको ईमेल गोप्य राखिनेछ ।