नवलपरासी (बर्दघाट सुस्तापश्चिम) : सुनवलमा शुक्रबार बिहान ट्रक र पिकअप गाडी ठक्कर खाँदा एकजनाको मृत्यु भएको छ। एक गम्भीर घाइते भएका छन्।
पूर्वपश्चिम राजमार्गअन्तर्गत सुनवल नगरपालिका–४ स्थित अल्कत्रेडाँडामा पूर्वबाट पश्चिमतर्फ जाँदै गरेको ना४च ९६३१ नम्बरको पिकअप र विपरीत दिशाबाट आउँदै गरेको ना५ख ९७१५ नम्बरको कोइला बोकेको ट्रक ठक्कर खाएका हुन्।
दुर्घटनामा गम्भीर घाइते भएका पिकअप चालक चितवन भरतपुर महानगरपालिका–१४ का ५२ वर्षीय राजकुमार विकको पृथ्वीचन्द्र अस्पताल परासीमा उपचारका क्रममा मृत्यु भएको जिल्ला प्रहरी कार्यालय परासीका सूचना अधिकारी प्रहरी नायब उपरीक्षक भोजराज पाण्डेयले जानकारी दिए।
दुर्घटनामा घाइते भरतपुर महानगरपालिका–२३ का २५ वर्षीय शिव श्रेष्ठको देवदह मेडिकल कलेजमा उपचार भइरहेको छ। उनको अवस्था मध्यम रहेको प्रहरीले जनाएको छ। प्रहरीले ट्रक चालक मकवानपुरको मनहरि गाउँपालिका–३ का ४८ वर्षीय कान्छा तामाङलाई पक्राउ गरेको छ।
तपाईंको ईमेल गोप्य राखिनेछ ।