गण्डकी : एक स्थानीय तह, एक खेलमैदान’ कार्यक्रमअन्तर्गत गत आवमा गण्डकी प्रदेशका १४ पालिकामा खेलमैदान निर्माण गरिएको छ।
सामाजिक विकास तथा स्वास्थ्य मन्त्रालयका अनुसार कास्कीको अन्नपूर्ण, स्याङ्जाको बिरुवा, गोरखाको भीमसेन थापा, तनहुँको म्याग्दे, नवलपुरको हुप्सेकोट, पर्वतको पैँयू गाउँपालिका, बागलङको गलकोट, म्याग्दीको बेनी नगरपालिकालगायत स्थानीय तहमा खेलमैदान निर्माण गरिएको हो ।
एउटा खेलमैदानका लागि पाँच लाख २५ हजारदेखि बढीमा रु १२ लाखसम्मको बजेट उपलब्ध गराइएको मन्त्रालयका सूचना अधिकारी श्रीप्रसाद अधिकारीले जानकारी दिए। ‘चालु आवमा पनि खेलमैदान निर्माणका लागि चार करोड बजेट छ’, उनले भने, ‘मन्त्रालयले मापदण्ड बनाएर नयाँ प्रस्ताव आह्वान गर्छ।’
गत आवमा ‘एक स्थानीय तह एक खेलमैदान’ कार्यक्रमका लागि रु एक करोड १५ लाख बजेट विनियोजन गरिएको थियो। प्रदेशका ८५ वटै स्थानीय तहमा खेल मैदान बनाउने प्रदेश सरकारको लक्ष्य छ। गण्डकीमा आर्थिक वर्ष २०७५/७६ देखि नै यो कार्यक्रम शुरु भएको हो।
खेल मैदानसहित गत आवमा ठूला–साना गरी १३७ वटा खेल पूर्वाधारका योजना सम्पन्न गरिएको मन्त्रालयले जनाएको छ। तिनमा पाँच लाखदेखि १५ लाख रुपैयाँसम्मको बजेट खर्च भएको हो। कतै खेल पूर्वाधारको निर्माण त कहीँ स्तरोन्नति गरिएको सूचना अधिकारी श्रीप्रसाद अधिकारीले बताए।
सङ्घ सरकारबाट आएको सशर्त बजेटका १५ वटा खेल पूर्वाधारका योजना पनि गत आवमा सम्पन्न गरिएको उनले जनाए। मन्त्रालयले पूर्वाधारतर्फ खेलमैदान, कभर्डहल, व्यायामशाला आदि निर्माण र स्तरोन्नतिका योजना सञ्चालन गर्दै आएको छ। खेलमैदानको निर्माण एवं स्तरोन्नतिसम्बन्धी मापदण्ड नै बनाएर कार्यक्रम कार्यान्वयन गरिँदै आएको छ।
हिमालपारिको जिल्ला मुस्ताङमा अन्तर्राष्ट्रियस्तरको उच्च उचाइ खेलमैदान निर्माणका लागि जग्गाको नापजाँचसहित विस्तृत डिजाइनको काम पूरा भएको मन्त्रालयले जनाएको छ । जग्गाको टुङ्गो लागेपछि आयोजनाको ‘डीपीआर’ बनाइने भएको छ।
आव २०७५/७६ मै प्रदेश सरकारले मुस्ताङको वारागुङ मुक्तिक्षेत्र गाउँपालिका–२ छेङ्गुरमा ‘हाइअल्टिच्युड’ पर्वतीय खेलकुद तालिम केन्द्र बनाउने घोषणा गरे पनि जग्गा व्यवस्थापन नहुँदा काम भएको छैन।
तपाईंको ईमेल गोप्य राखिनेछ ।