महोत्तरी : माघको दोस्रो साता बित्नै लाग्दासमेत हिउँदै वर्षा नहुँदा किसान चिन्तित छन्। चिसोले खेतबारीमा लगाइएका बाली कक्रिँदै गएका छन्।
‘हुस्सु र चिसो स्याँठले अझै छाडेको छैन’, महोत्तरीको बलवा–१० धमौराका हासिम राइनले भने, ‘एकपटक पानी परे हुस्सु फाटेर चिसो हावा चल्न छाड्ने थियो, तर खै पानी पर्ने त छाँट नै छैन।’ पानी नपर्दा लगातारको शीतलहरले तरकारी बालीलाई क्षति पुर्याएको उनको गुनासो छ। ‘बाक्लो तुसारोले आलु बोटमै सुक्यो, गोलभेँडा सड्दै बोटबाट झर्दैछन्। कोभीका फूल बढ्न नसकेर कक्रेका छन्’, उनले भने, ‘एकपटक अहिले पानी परे मौसम सफा भएर घाम तात्न थाल्थे, बालीनालीलाई राहत मिल्थ्यो।’
विगतमा माघ लागेपछि हुस्सु फाट्दै गएर पारिलो घाम लाग्ने किसान बताउँछन्। ‘माघे संक्रान्तिमनाएपछि त घाम लाग्थ्यो। तर यसपालि त माघ आधा हुन लाग्दासम्म हुस्सुले छाडेको छैन’, भङ्गाहा–४ रामनगरका ८५ वर्षीय किसान मोती महतोले भने, ‘यो मौसमको कुलक्षण नै हो। आउने दिन खुशीका हुने छैनन्।’ हिउँदे वर्षा नहुँदा बालीनाली हुर्किन नसकेका र खानेपानीका स्रोत मुहान सुक्दै जाने भन्दै उनले चिन्ता व्यक्त गरे।
हिउँदे वर्षा हुस्सु फटाउने, चिसो पश्चिमी हावा चल्न छाड्ने र क्रमशः घाम तताउँदै लग्ने मात्र नभई बालीनालीका लागि अत्यन्त पोसिलो हुने जनाइएको छ। बर्दिबास–१२ डाँडाटोल बिजलपुराका ७५ वर्षीय किसान रामसुन्दर ठाकुरले भर्खरै हुर्किँदै गरेका वैशाखी लहरे तरकारी, उखु, अन्नबालीमा गहुँ र आँपसहितका फलका रुख हिउँदे वर्षा पाएपछि लहलहाउने बताए।
हिउँदमा पानी नपरेपछि खानेपानीका स्रोत इनार, चापाकल पनि गर्मी चढेसँगै चाँडै सुक्ने गरेका छन्। भङ्गाहा–४ रामनगरकै ९० वर्षीय हाजीबिहारी अन्सारीले यसपालि माघ दोस्रो साता बित्दै गर्दासम्म पानी नपरेको हुँदा नै हुस्सु र चिसो हावा नफाटेको बताए।
फलफूल खेती (आँप, लिची, सपाटो र रुख कटहर) सघन हुने बर्दिबास नगरपालिकाका बिजलपुरा, पशुपतिनगर, खयरमारा, चेरु, गणन्ता, ढुङ्ग्रे, टुटेश्वर, पाटु, वरडाँडा र माईस्थानका किसान यसपालि हिउँदे वर्षा नभएपछि फलका रुखमा मञ्जरी कम लाग्ने, लागे पनि धेरै झर्ने र मधुवारोगको समस्या बढ्ने चिन्तामा छन्।
यसैगरी जिल्लाकै फलफूलखेतीको पकेटक्षेत्र मानिने गौशाला नगर क्षेत्रका भरतपुर, लक्ष्मीनियाँ र बेलगाछीका किसान पनि हिउँदे वर्षा नहुँदा अपेक्षित उत्पादन लिन नसकिने जनाइएको छ।
हिउँदे वर्षाले बालीनालीका लागि माटो भिजाउनेमात्र नभई रोग लाग्न नदिने र बाली हलक्क बढाउँछ। ‘हिउँदे वर्षा सिँचाइका लागिमात्र होइन, बालीको पोषण र रोग प्रतिरोधका लागि पनि सहयोग हुन्छ’, बर्दिबास–९ पशुपतिनगरको झ्याकुलेटोलका किसान महेन्द्र महतोले भने, ‘हिउँदे वर्षा नहुँदा प्रकृतिका सन्तुलन खलबलिन्छन्। जताततै यसको असर बढ्नेछ।’ हिउँदे वर्षाको मानव र यावत जीवजन्तुको स्वास्थ्य र आहारव्यहारमा पनि सकारात्मक प्रभाव हुने ८५ वर्षीय नथुनी महतोको अनुभव छ।
महोत्तरीको कुल ७१ हजार हेक्टर खेतीयोग्य जग्गामध्ये अधिकांशमा आकाशे पानीको भरमा खेती गरिन्छ। यहाँ १० प्रतिशतमात्र खेतीयोग्य जग्गामा स्थायी सिँचाइ पुगेको छ । हिउँदे वर्षा नहुँदा पानीका मुहान चाँडै सुक्ने र विभिन्न रोगव्याधि बढ्ने गर्छन्।
तपाईंको ईमेल गोप्य राखिनेछ ।