धनुषा : जनकपुरमा छुरा प्रहार गरी एक युवकको हत्या भएको छ। सोमबार दिउँसो जनकपुरधाम उपमहानगरपालिका वडा नम्बर ४ स्थित विश्वकर्मा चोकमा २० वर्षीय प्रिन्स महासेठको छुरा प्रहार गरी हत्या भएको धनुषाका प्रहरी प्रवक्ता रञ्जन अवाले बताए।
प्रवक्ता अवाका अनुसार विश्वकर्मा चोकमा तीनचार जनाको एक समूहबीच झगडा हुँदा महोत्तरीको एकडारा गाउँपालिका वडा नम्बर ३ भटौलीया निवासी प्रिन्समाथि छुरा प्रहार भएको थियो।
गाउँको सम्पती बेचेर उनको परिवार जनकपुर बस्दै आएको थियो। बुवा जमाहिर लाल महासेठको कोरोना कालमा मृत्यु पश्चात आमाले फलफूल व्यवसाय गरी बालबच्चाको पालन पोषण गर्दै आएकी थिइन।
प्रिन्सलाई उपचारका लागि लैजाँदै गर्दा मृत्यु भएको प्रवक्ता अवाले बताए। स्थानीयका अनुसार छुरा प्रहारबाट गम्भीर घाइते प्रिन्स त्यहाँबाट भाग्दै गर्दा बाटोमा लडी बेहोस भएका थिए।
सोही अवस्थामा स्थानीय र प्रहरीले प्रिन्सलाइ उद्धार गरी प्रादेशिक अस्पताल जनकपुरधाममा लैजाँदै गर्दा बाटोमै मृत्यु भएको हो। घटनामा संलग्न रहेको आरोपमा प्रहरीले दुई जनालाई नियन्त्रणमा लिएको छ।
जनकपुरधामको शान्तिनगर बस्ने रोशन दास र अर्का ठेगाना खुल्न नसकेको अर्जुन साहलाई अनुसन्धानका लागि पक्राउ गरिएको प्रवक्ता अवाले बताए।
मृतक युवकको शव पोस्टमार्टमका लागि प्रादेशिक अस्पताल जनकपुरमा राखिएको र घटना विषयमा थप अनुसन्धान गरिरहेको जिल्ला प्रहरी कार्यालय धनुषाले जनाएको छ।
तपाईंको ईमेल गोप्य राखिनेछ ।