काठमाडौँ : स्वतन्त्र ऊर्जा उत्पादकहरूको संस्था नेपाल (इप्पान) का अध्यक्ष गणेश कार्कीले विदेशी लगानीकर्तालाई नेपालको जलविद्युतमा लगानी गर्दा हुने फाइदाबारे सरकारले स्पष्ट पार्न सक्नुपर्ने बताएका छन्।
बिहीवार इप्पानले काठमाडौँमा आयोजना गरेको एक कार्यक्रममा अध्यक्ष कार्कीले यस्तो बताएका हुन्। उनले सरकारले लगानी सम्मेलनमा विदेशी लगानीकर्तालाई जलविद्युतका लगानी गर्दा फाइदाका विषयमा स्पष्ट भन्न र देखाउन सक्नुपर्ने बताए।
उनले त्यसको लागि सरकारले लगानी सम्मेलनअघि आवश्यक नीतिगत सुधार तत्काल गर्न आवश्यक रहेको बताए। उनले सरकारले पनि जलविद्युतको विकासको लागि विदेशी मात्रै नभएर स्वदेशी लगानीकर्तालाई जलविद्युतमा लगानी गर्न आह्वान गर्नुपर्ने बताए।
उनले सरकार र जनताको पनि सपना नेपाललाई समृद्ध बनाउने भएको बताए। उनले नेपाललाई समृद्ध बनाउने गरी सरकारले २८ हजार मेगावट विद्युत उत्पादन गर्ने लक्ष्य राखेको भन्दै त्यसको लागि ४६ खर्ब रुपैयाँ आवश्यक रहेको बताए।
उनले सरकारले लगानी सम्मेलनको लागि विश्वभरका १ हजारभन्दा बढीलाई निम्ता गरेको जानकारी पाएको बताए।
‘सरकारले २८ हजार मेगावट विद्युत उत्पादन गर्ने लक्ष्य छ‚ त्यसका लागि ४६ खर्ब आवश्यक पर्छ भनिएको छ। सरकारले विश्वभरका १ हजारभन्दा बढीलाई निम्ता गरेको छ‚’ उनले भने, ‘सरकारले सम्मेलनअघि नीतिगत सुधार गर्नुपर्छ। जलविद्युतमा लगानी गर्न आउँदा विदेशी लगानीकर्तालाई फाइदाका विषयमा स्पष्ट रुपमा बोल्न सक्नुपर्छ।’
उनले लगानी सम्मेलनलाई सहयोग पुग्नेगरी नै इप्पानले हिमालयन एस्क्पोमा विश्वका धेरै लगानीकर्ता कम्पनीलाई बोलाएको बताए। उनले विदेशी धेरै सप्लायर्स कम्पनी, डिजाइनरहरु नेपालमा जलविद्युतमा लगानी गर्न इच्छुक रहेको बताए।
उनले सरकारको उद्देश्यअनुसार मुलुकमा २८ हजार विद्युत उत्पादन गर्ने वा सार्थक बनाउन एक्स्पो आयोजना गरेको बताए। उनले इप्पान जलविद्युत विकासमा सरकारसँग हातेमालो गरेर अघि बढ्ने बताए।
तपाईंको ईमेल गोप्य राखिनेछ ।