जनकपुरधाम : गत चैत १७ गते बारा र पर्सा जिल्लामा आएको हावाहुरी पीडितका लागि प्रदेश १ को सरकारले एक करोड रुपैयाँ सहयोग गरेको छ। बारा पर्साको हावाहुरी पीडितको लागि प्रदेश १ का मुख्यमन्त्रीले घोषणा गरेको एक करोड सहयोगको चेक सोमबार एक समारोहबीच हस्तान्तरण गरिएको हो।
प्रदेश १ का मुख्यमन्त्री शेरधन राइले प्रदेश २ का मुख्यमन्त्री लालबाबु राउतलाई राहत रकमको चेक हस्तान्तरण गरेका हुन्। मुख्यमन्त्री तथा मन्त्रीपरिषदको कार्यालयमा आयोजित कार्यक्रममा प्रदेश १ का मुख्यमन्त्री राईले हावाहुरीले निम्त्याएको विपदमा प्रदेश १ ले सानो सहयोग गरेर प्रदेश २ को विपद्मा हामी सबै एकजुट रहेको सन्देश दिन खोजेको बताए।
कार्यक्रममा प्रदेश २ का मुख्यमन्त्री राउतले प्रदेश १ को सहयोगप्रति आभार व्यक्त गर्दै मुलुक संघीय संरचनामा गएपछि प्रदेश प्रदेश बीचको सहकार्य र सम्बन्धमा मजबुत बनाउने आधार प्रारम्भ भएको बताए। बारा पर्सामा चैत्र १८ गते आएको हावाहुरी २९ जनाको मृत्यु भएको थियो भने करोडौंको क्षति भएको थियो।
तपाईंको ईमेल गोप्य राखिनेछ ।