डडेल्धुरा: डडेल्धुरामा बाघको हड्डीसहित २ जना पक्राउ परेका छन्। जिल्ला प्रहरी कार्यालय डडेल्धुरा र सुदूरपश्चिम प्रदेश अनुसन्धान ब्यूरो (आरआईटी) को संयुक्त टोलीले दुई युवकलाई पक्राउ गरेको हो।
पक्राउ पर्नेमा बाजुराको बुढीगंगा नगरपालिका–१० घर भई बडिमालिका नगरपालिका–८ मार्तडीमा बीसीडी वर्कसपका सञ्चालक २६ वर्षीय राजेन्द्र जैसी र बाजुराकै खप्तडछेडेदह गाउँपालिका–७ घर भई मार्तडीकै शीतल मदिरा स्टोरका सञ्चालक २७ वर्षीय वीरबहादुर ओली रहेका छन्।
जिल्ला प्रहरी कार्यालयका प्रमुख एवं प्रहरी नायब उपरीक्षक मनोहर भट्टका अनुसार दुवैजनालाई शनिबार राति साढे बजे १२ अमरगढी नगरपालिका–५ बागबजारबाट पक्राउ गरिएको हो। पक्राउ गरेका जैसी र ओलीलाई आइतबार जिल्ला प्रहरी कार्यालयले पत्रकार सम्मेलनमार्फत सार्वजनिक गरेको छ।
‘संरक्षित वन्यजन्तुको आखेटोपहार अवैध रूपमा ओसारपसार तथा खरिद बिक्री गर्न लागेको भन्ने विशेष सूचनाको आधारमा हामीले उनीहरूलाई पक्राउ गरेका हौं’, डीएसपी भट्टले भने, ‘प्रहरी टोलीले उनीहरूले बोकेको झोला चेकजाँच गर्दा झोलामा रहेको संरक्षित वन्यजन्तुको आखेटोपहारको जस्तो देखिने वस्तु फेला पारी दुवै युवकलाई नियन्त्रणमा लियौं।’
उनीहरूको झोलाबाट टाउकोजस्तो देखिने अस्थिपञ्जर हड्डीमाथि तर्फका चारवटा दाँत देखिएको हड्डी एक थान, तल्लो बंगारा जस्तो देखिने हड्डी दुई थान, मेरुदण्डको जस्तो देखिने हड्डी २९ थान, करङको जस्तो हड्डी २२ थान, फीलपातको जस्तो देखिने हड्डी ५ थान, नली हड्डी जस्तो देखिने हड्डी १० थान, विभिन्न प्रकारका ससाना हड्डी २७ गरी जम्मा ९६ थान हड्डी बरामद गरिएको डीएसपी भट्टले बताए। उनका अनुसार ४.०५ किलो हड्डी बरामद गरिएको हो।
बरामद गरिएको बाघको हड्डी अनुसन्धानका लागि डिभिजन वन कार्यालय डडेल्धुरालाई जिम्मा लगाइएको प्रहरी नायब उपरीक्षक भट्टले जानकारी दिए। राष्ट्रिय निकुञ्ज तथा वन्यजन्तु संरक्षण ऐन २०२९ बमोजिम कसुरको गम्भीरता हेरी ६ महिनादेखि १५ वर्षसम्म कैद र २० हजारदेखि १० लाख रुयैयाँसम्म जरिवाना हुने कानुनी व्यवस्था छ।
तपाईंको ईमेल गोप्य राखिनेछ ।