बिर्तामोड : होटलको कोठा बुक गरी जुवातास खेलिरहेको अवस्थामा प्रहरीले झापाको बिर्तामोडबाट ७ जनालाई पक्राउ गरेको छ।
बिर्तामोड-६ स्थित पञ्चकन्या होटल एण्ड लजको ६ नम्बर कोठाबाट उनीहरुलाई पक्राउ गरिएको इलाका प्रहरी कार्यालय बिर्तामोडले जनाएको छ। पक्राउ पर्नेहरुमा शनिअर्जुन-६ का सञ्जिव पाठक, बिर्तामोड-६ का प्रकाश धमला, सोही स्थानका सनम तामाङ, सन्तोष गजमेर, अनिल थापा, किरण तामाङ र इलाम मङ्गलबारे-४ का कुमार खाती छन्।
उनीहरुले हारमारको बाजी राखेर जुवातास खेल्दै गरेको अवस्थामा पक्राउ गरिएको इलाका प्रहरी कार्यालय बिर्तामोडका डीएसपी केशवकुमार थेबेले बताए। उनीहरुको साथबाट ६१ हजार ९ सय ५५ रुपैयाँ र ३ बुङ ताससमेत बरामद गरिएको जनाइएको छ।
पक्राउ परेकाहरुलाई कारवाहीका लागि जिल्ला प्रशासन कार्यालय झापामा पठाइएको प्रहरीले जनाएको छ।
तपाईंको ईमेल गोप्य राखिनेछ ।