काठमाडौं : आज असार ४। स्थानीय तहको दोस्रो चरणको निर्वाचनका लागि प्रदेश नम्बर १, ५ र ७ का ३३४ स्थानीय तहमा उम्मेदवारी मनोनयन दर्ता भइरहेको छ। बिहान ८ बजेबाट सुरु भएको मनोनयन दर्ता अपराह्न ४ बजेसम्म जारी रहनेछ।
सरकारले प्रदेश नम्बर २ को निर्वाचन असोज २ गतेलाई सारेपछि ३ वटा प्रदेशमा मात्रै मनोनयन दर्ता भइरहेको हो। ७ मध्ये ३ वटा प्रदेशमा वैशाख ३१ गते नै चुनाव भइसकेको छ।
आयोगका अनुसार दोस्रो चरणमा १ महानगर, ७ उपमहानगर, १ सय ११ नगरपालिका र २ सय १५ गाउँपालिकामा निर्वाचन हुन लागेको छ। ती स्थानमा १५ हजार ३८ जनप्रतिनिधी चुनिने छन् भने ६४ लाख ३२ हजार ७ सय ६५ जना मतदाताले मतदानमा भाग लिनेछन्। दोस्रो चरणको निर्वाचनका लागि ८ हजार ३ सय ६४ मतदान केन्द्र तोकिएका छन्।
इलाम नगरपालिकामा संघीय लिम्वुवान मञ्चको तर्फबाट प्रमुखमा निर्मला चेम्जोङले उम्मेदवारी दर्ता गराएकी छन्। इलामका १० स्थानीय तहमध्ये प्रमुख पदमा महिला उम्मेदवार उनी मात्र रहेकी थाहा संवाददाता नमिन ढकालले जानकारी दिए।
तपाईंको ईमेल गोप्य राखिनेछ ।